വ്യാജ രജിസ്‌ട്രേഷന്‍ നമ്പര്‍ ഉപയോഗിച്ച് വാഹനം ഓടിച്ച കെ എസ് ആര്‍ ടി സി ഡ്രൈവര്‍ അറസ്റ്റില്‍

പത്തനംതിട്ട | വ്യാജ രജിസ്‌ട്രേഷന്‍ നമ്പര്‍ ഉപയോഗിച്ച് വാഹനം ഓടിച്ച കെ എസ് ആര്‍ ടി സി ഡ്രൈവര്‍ അറസ്റ്റില്‍.ചെങ്ങറ രാജേഷ് ഭവനം വീട്ടില്‍ അയ്യപ്പന്‍ (42) ആണ് പിടിയിലായത്.

പിക്കപ്പ് വാഹനം നമ്പര്‍ മാറ്റി ഓടിക്കുന്നതായി വിവരം ലഭിച്ചതിന്റെ അടിസ്ഥാനത്തില്‍ കോന്നി പോലീസ് വാഹനം കസ്റ്റഡിയിലെടുത്തു.പോലീസ് ഇന്‍സ്‌പെക്ടര്‍ പി ശ്രീജിത്തിന്റെ നേതൃത്വത്തിലാണ് നടപടി സ്വീകരിച്ചത്.പരിശോധനയില്‍ കെ എല്‍ 03 എ എഫ് 2541 എന്ന മഹീന്ദ്ര പിക്കപ്പ് വാഹനത്തില്‍ കെ എല്‍ 03 എ ഡി 3008 എന്ന നമ്പര്‍ വ്യാജമായി പതിച്ച് ഓടിക്കുകയാണ് എന്ന് വെളിവായി.ഇയാള്‍ക്കെതിരെ പൊതു ഖജനാവിനും സര്‍ക്കാര്‍ വകുപ്പുകള്‍ക്കും നഷ്ടമുണ്ടാക്കിയതിനെതിരായ വകുപ്പുകള്‍ കൂടി ചേര്‍ത്താണ് പോലീസ് കേസെടുത്തത്.

വണ്ടിയുടെ എന്‍ജിന്‍ നമ്പര്‍ പരിശോധിച്ചപ്പോള്‍ യഥാര്‍ത്ഥ രജിസ്‌ട്രേഷന്‍ നമ്പരും യഥാര്‍ത്ഥ ഉടമയെയും പോലീസ് കണ്ടെത്തി. നിയമാനുസരണം ഉള്ള ഇന്‍ഷുറന്‍സ്, ഫിറ്റ്‌നസ് സര്‍ട്ടിഫിക്കറ്റുകള്‍ ഇല്ലാതെ വ്യാജ രജിസ്‌ട്രേഷന്‍ നമ്പര്‍ പതിച്ചാണ് ഗുഡ്‌സ് ക്യാരിയര്‍ ആയി സര്‍വീസ് നടത്തിവന്നിരുന്നതെന്നും അന്വേഷണത്തില്‍ ബോധ്യപ്പെട്ടു.

പത്തനംതിട്ട കെ എസ് ആര്‍ ടി സി ഡിപ്പോയില്‍ 2015 മുതല്‍ ജോലി നോക്കി വരുന്ന ഡ്രൈവര്‍ ആണ് പ്രതി. ഇപ്പോള്‍ സര്‍വിസിലുള്ള ഇയാള്‍, കോഴിക്കോട് റൂട്ടിലെ ബസിലാണ് നിലവില്‍ ജോലി ചെയ്യുന്നത്. ഇയാളെ പറ്റി പോലീസ് വിശദമായി അന്വേഷിച്ചു വരികയാണ്. ഗതാഗത നിയമങ്ങള്‍ ലംഘിച്ച് ഗുഡ്‌സ് കാരിയറായി വാഹനം ഉപയോഗിച്ചുകൊണ്ട് ഏതെങ്കിലും കുറ്റകൃത്യങ്ങളില്‍ ഏര്‍പ്പെട്ടിട്ടുണ്ടോ ഇയാള്‍ക്കൊപ്പം വേറെ പ്രതികളുണ്ടോ എന്ന് തുടങ്ങിയ കാര്യങ്ങളില്‍ കൂടുതല്‍ അന്വേഷണം നടത്തുന്നതിനും മറ്റുമായി പ്രതിയെ കസ്റ്റഡിയില്‍ വാങ്ങി ചോദ്യം ചെയ്യാനാണ് പോലീസിന്റെ നീക്കം.