കായിക മന്ത്രി നയിക്കുന്ന കിക് ഡ്രഗ്സ് യാത്ര 22ന് ഇടുക്കിയില്‍

ഇടുക്കി | സംസ്ഥാന സര്‍ക്കാരിന്റെ ലഹരിവിരുദ്ധ ക്യാമ്പയിന്റെ ഭാഗമായി കായിക വകുപ്പിന്റെ നേതൃത്വത്തില്‍ മന്ത്രി വി അബ്ദു റഹ്്മാന്‍ നേതൃത്വം നല്‍കുന്ന ലഹരി വിരുദ്ധ സന്ദേശയാത്ര 22ന് ഇടുക്കി ജില്ലയില്‍ പര്യടനം നടത്തുമെന്ന് സ്പോര്‍ട്സ് കൗണ്‍സില്‍ ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. യാത്രയുടെ ഭാഗമായി ജില്ലാ സ്പോര്‍ട്സ് കൗണ്‍സിലിന്റെയും അത്‌ലറ്റിക്സ് അസ്സോസിയേഷന്റെയും നേതൃത്വത്തില്‍ രാമക്കല്‍മേട് മുതല്‍ പടിഞ്ഞാറെ കവല വരെ മാരത്തോണ്‍ സംഘടിപ്പിക്കും.രാവിലെ 8.30ന് പടിഞ്ഞാറെ കവലയില്‍ നിന്നും കിഴക്കേ കവലയിലേക്ക് കായിക മന്ത്രി അബ്ദുറഹ്മാന്‍, ജലവിഭവ മന്ത്രി റോഷി അഗസ്റ്റിന്‍, എം എല്‍ എമാര്‍, ജില്ലാ തല ഉദ്യോഗസ്ഥര്‍ എന്നിവരുടെ നേതൃത്വത്തില്‍ വാക്കത്തോണ്‍ ആരംഭിക്കും. കിഴക്കേ കവലയില്‍ പൊതുസമ്മേളനം നടക്കും.

3.30ന് തൊടുപുഴ മങ്ങാട്ടു കവല ബസ് സ്റ്റാന്‍ഡില്‍ നിന്നും ഗാന്ധി സ്‌ക്വയറിലേക്ക് ലഹരി വിരുദ്ധ മഹാറാലി സംഘടിപ്പിക്കും. ഗാന്ധി സ്‌ക്വയറില്‍ പൊതുസമ്മേളനം നടക്കും. വൈകിട്ട് ആറിന് തൊടുപുഴ മര്‍ച്ചന്റ് അസോസിയേഷന്‍ ഹാളില്‍ കായിക അസോസിയേഷന്‍ പ്രതിനിധികളും, കായിക അധ്യാപകരും കായിക താരങ്ങളുമായി മന്ത്രി കൂടിക്കാഴ്ച നടത്തും.
നിര്‍മാണത്തിലിരിക്കുന്ന പച്ചടി ഇന്‍ഡോര്‍ സ്റ്റേഡിയം, നെടുങ്കണ്ടം പഞ്ചായത്ത് സ്റ്റേഡിയം, എഴുകുംവയല്‍ വോളിബോള്‍ സ്റ്റേഡിയം, കാല്‍വരിമൗണ്ട് ഹൈസ്‌കൂള്‍ സ്റ്റേഡിയം, ഇടുക്കി ഐ ഡി എ സ്റ്റേഡിയം എന്നിവ കായിക മന്ത്രി സന്ദര്‍ശിക്കും. പരിപാടിയുടെ മുന്നൊരുക്ക പ്രവര്‍ത്തനങ്ങള്‍ക്കായി പഞ്ചായത്ത് തലത്തില്‍ വിപുലമായ പ്രചാരണ പ്രവര്‍ത്തനങ്ങള്‍ ജില്ലാ ഭരണകൂടവും പഞ്ചായത്ത് പ്രസിഡന്റ്‌സ് അസോസിയേഷനും ചേര്‍ന്ന് സംഘടിപ്പിക്കും. 19, 20 തീയതികളില്‍ എല്ലാ പഞ്ചായത്തുകളിലും കൂട്ടയോട്ടം നടക്കും. 21 ന് എല്ലാ വാര്‍ഡിലും ലഹരി വിരുദ്ധ സന്ദേശ മോണിങ് വാക്കത്തോണ്‍ (നടത്തം) സംഘടിപ്പിക്കും.

പരിപാടിയുടെ വിജയത്തിനായി മന്ത്രി റോഷി അഗസ്റ്റിന്‍ രക്ഷാധികാരിയും, ജില്ലാ പഞ്ചായത്ത് പ്രസിഡന്റ് രാരിച്ചന്‍ നീര്‍ണാകുന്നേല്‍ ചെയര്‍മാനും, ജില്ലാ കലക്ടര്‍ വി വിഗ്‌നേശ്വരി വൈസ് ചെയര്‍മാനും, സ്‌പോര്‍ട്‌സ് കൗണ്‍സില്‍ പ്രസിഡന്റ് റോമിയോ സെബാസ്റ്റ്യന്‍ ജനറല്‍ കണ്‍വീനറും ആയി ജില്ലാതല സംഘാടക സമിതി രൂപീകരിച്ചിട്ടുണ്ട്.

വാര്‍ത്താ സമ്മേളനത്തില്‍ ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് റോമിയോ സെബാസ്റ്റിയന്‍, സംസ്ഥാന സ്‌പോര്‍ട്‌സ് കൗണ്‍സില്‍ അംഗം കെ എല്‍ ജോസഫ്, ജില്ലാ സ്‌പോര്‍ട്‌സ് കൗണ്‍സില്‍ അംഗം പി കെ രാജേന്ദ്രന്‍, ജില്ലാ സ്‌പോര്‍ട്‌സ് കൗണ്‍സില്‍ സെക്രട്ടറി പി എ ഷാജിമോന്‍ പങ്കെടുത്തു.