അഹമ്മദാബാദില്‍ വ​യോ​ധി​ക​യെ കെ​ട്ടി​യി​ട്ട് കൊ​ല​പ്പെ​ടു​ത്തി

ഗാന്ധിനഗര്‍| അഹമ്മദാബാദിലെ കുബേര്‍നഗറില്‍ വയോധികയെ വീടിനുള്ളില്‍ മരിച്ച നിലയില്‍ കണ്ടെത്തി. ഛാരന്‍നഗര്‍ സ്വദേശിനി ഭാരതി ബജരംഗ് (65) ആണ് കൊല്ലപ്പെട്ടത്. വീട്ടില്‍ സൂക്ഷിച്ചിരുന്ന സ്വര്‍ണവും പണവും മോഷണം പോയിട്ടുണ്ട്.

ഭാരതിയുടെ അയല്‍വാസി വീടിന്റെ വാതില്‍ പലതവണ തട്ടിയിട്ടും പ്രതികരണമില്ലാത്തതിനെ തുടര്‍ന്ന് മകന്‍ ഹിതിഷ് ബജരംഗിനെ വിവരം അറിയിക്കുകയായിരുന്നു. ഹിതിഷും കുടുംബവും വാതില്‍ തകര്‍ന്ന് അകത്തു കയറിയപ്പോള്‍ കട്ടിലിന് സമീപം ഭാരതിയെ തുണികൊണ്ട് കെട്ടിയിട്ട നിലയില്‍ കണ്ടെത്തി. തലയ്ക്ക് സമീപം രക്തം പുരണ്ട തലയിണ കണ്ടെത്തി.

ലോക്കറിലുണ്ടായിരുന്ന ഒന്നര പവന്റെ സ്വര്‍ണാഭരണങ്ങളും ഒരു ലക്ഷം രൂപയും നഷ്ടപ്പെട്ടിട്ടുണ്ട്. വീടിന് പിന്‍വശത്തെ അടുക്കള വാതില്‍ തുറന്നു കിടക്കുകയായിരുന്നു വെന്ന് ഹിതേഷ് പോലീസിനോട് പറഞ്ഞു. ഹിതേഷിന്റെ പരാതിയുടെ അടിസ്ഥാനത്തില്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.