സ്‌കോഡ സ്ലാവിയ ഡെലിവറി മാര്‍ച്ചില്‍

ന്യൂഡല്‍ഹി| ഈ സാമ്പത്തിക വര്‍ഷം അവസാനിക്കുന്നതിന് മുമ്പ് സ്ലാവിയ മിഡ്-സൈസ് സെഡാന്‍ പുറത്തിറക്കുമെന്ന് ചെക്ക് വാഹന നിര്‍മ്മാതാക്കളായ സ്‌കോഡ. സ്‌കോഡ സ്ലാവിയ സെഡാന്റെ ഉപഭോക്തൃ ഡെലിവറി 2022 മാര്‍ച്ചില്‍ ആരംഭിക്കുമെന്ന് കമ്പനി സ്ഥിരീകരിച്ചു. പുതിയ സ്ലാവിയ സെഡാന്റെ ഔദ്യോഗിക ലോഞ്ച് തീയതി സ്‌കോഡ ഇതുവരെ സ്ഥിരീകരിച്ചിട്ടില്ല. 2022 ഫെബ്രുവരി അവസാനമോ മാര്‍ച്ചിലോ ലോഞ്ച് ചെയ്യപ്പെടുമെന്ന് പ്രതീക്ഷിക്കുന്നു. ഇത് സ്‌കോഡ കുഷാക്കിനും വിഡബ്ല്യു ടൈഗണിനും അടിവരയിടുന്ന വിഡബ്ല്യു ഗ്രൂപ്പിന്റെ എംക്യുബി എഒ ഐഎന്‍ പ്ലാറ്റ്ഫോമിനെ അടിസ്ഥാനമാക്കിയുള്ളതാണ്.

1.0 ലിറ്റര്‍ ടിഎസ്‌ഐ പെട്രോളും 1.5 ലിറ്റര്‍ ടിഎസ്‌ഐ പെട്രോള്‍ എഞ്ചിനും സ്‌കോഡ വാഗ്ദാനം ചെയ്യും. ചെറിയ മൂന്ന് സിലിണ്ടര്‍ പെട്രോള്‍ എഞ്ചിന് 113 ബിഎച്ച്പി കരുത്തും 175 എന്‍എം ടോര്‍ക്കും ഉത്പാദിപ്പിക്കാന്‍ കഴിയും. ആറ് സ്പീഡ് മാനുവല്‍, ആറ് സ്പീഡ് ഓട്ടോമാറ്റിക് ഗിയര്‍ബോക്‌സ് ഓപ്ഷനുകളില്‍ ഇത് ലഭ്യമാണ്. വലിയ 1.5 ലിറ്റര്‍ ഫോര്‍ സിലിണ്ടര്‍ ടര്‍ബോചാര്‍ജ്ഡ് എഞ്ചിന്‍ 150 ബിഎച്ച്പി കരുത്തും 250 എന്‍എം ടോര്‍ക്കും ഉത്പാദിപ്പിക്കുന്നു. ആറ് സ്പീഡ് മാനുവല്‍, ഏഴ് സ്പീഡ് ഡിഎസ്ജി ഓട്ടോമാറ്റിക് ഗിയര്‍ബോക്സ് ഓപ്ഷനുകളില്‍ ഇത് ലഭ്യമാണ്.