അതിർത്തി കടന്നുള്ള ചരക്ക് നീക്കം വേഗത്തിലാക്കാൻ ഷാർജ - ഒമാൻ ധാരണ

ഷാർജ|ഷാർജയും ഒമാനും തമ്മിലുള്ള വ്യാപാര ബന്ധം മെച്ചപ്പെടുത്തുന്നതിന്റെയും അതിർത്തികളിലെ ചരക്ക് നീക്കം വേഗത്തിലാക്കുന്നതിന്റെയും ഭാഗമായി ഇരു രാജ്യങ്ങളിലെയും ഉന്നത ഉദ്യോഗസ്ഥർ ചർച്ച നടത്തി. ഷാർജ കസ്റ്റംസ് അധികൃതരും ഒമാനിലെ ബന്ധപ്പെട്ട വകുപ്പുകളും തമ്മിൽ നടന്ന കൂടിക്കാഴ്ചയിൽ അതിർത്തി കടന്നുള്ള ഗതാഗത തടസ്സങ്ങൾ ഒഴിവാക്കുന്നതിനുള്ള നടപടികൾക്ക് രൂപം നൽകി. അത്യാധുനിക സാങ്കേതിക വിദ്യകൾ ഉപയോഗിച്ച് പരിശോധനാ നടപടികൾ ലളിതമാക്കാനും ചരക്ക് വാഹനങ്ങളുടെ കാത്തിരിപ്പ് സമയം കുറയ്ക്കാനും തീരുമാനമായി.

കസ്റ്റംസ് നടപടിക്രമങ്ങൾ ഏകീകരിക്കുന്നതിനും വിവരങ്ങൾ പരസ്പരം കൈമാറുന്നതിനും പുതിയ സംവിധാനം ഏർപ്പെടുത്തും. ഇത് വഴി നിയമവിരുദ്ധമായ പ്രവർത്തനങ്ങൾ തടയുന്നതിനൊപ്പം തന്നെ നിയമാനുസൃതമായ വ്യാപാരം കൂടുതൽ എളുപ്പമാകും. ഷാർജയിലെ വ്യവസായ മേഖലയ്ക്കും ഒമാനിലെ വിപണികൾക്കും പുതിയ തീരുമാനം വലിയ ഗുണം ചെയ്യും. വ്യാപാര പ്രമുഖർക്കും ചരക്ക് ഗതാഗത കമ്പനികൾക്കും ആശ്വാസകരമായ മാറ്റങ്ങൾ ഉടൻ നിലവിൽ വരുമെന്ന് ഷാർജ കസ്റ്റംസ് ഡയറക്ടർ പറഞ്ഞു. ഒമാനും യു എ ഇയും തമ്മിലുള്ള ദീർഘകാലമായുള്ള സഹോദര ബന്ധത്തിന്റെ പ്രതിഫലനമാണ് ഇത്തരം ചർച്ചകളെന്ന് അദ്ദേഹം കൂട്ടിച്ചേർത്തു.

ചരക്ക് നീക്കം വേഗത്തിലാക്കുന്നത് വഴി ഉത്പന്നങ്ങളുടെ വില കുറയ്ക്കാനും വിപണിയിൽ കൂടുതൽ ഉണർവ് കൊണ്ടുവരാനും സാധിക്കും. വരും മാസങ്ങളിൽ കൂടുതൽ അതിർത്തി കവാടങ്ങളിൽ സ്മാർട്ട് പരിശോധനാ സംവിധാനങ്ങൾ ഏർപ്പെടുത്താൻ ഷാർജയും ഒമാനും ലക്ഷ്യമിടുന്നു.