നിപ വൈറസ് ജാഗ്രത: വിമാനത്താവളങ്ങളിൽ പരിശോധന കർശനമാക്കി

ദുബൈ|പശ്ചിമ ബംഗാളിൽ നിപ വൈറസ് റിപ്പോർട്ട് ചെയ്ത പശ്ചാത്തലത്തിൽ ഇന്ത്യയിലേക്ക് യാത്ര ചെയ്യുന്നവർക്ക് ആരോഗ്യ മന്ത്രാലയം ജാഗ്രതാ നിർദേശം നൽകി. വിവിധ ഏഷ്യൻ രാജ്യങ്ങൾ വിമാനത്താവളങ്ങളിൽ പരിശോധന കർശനമാക്കിയ സാഹചര്യത്തിൽ യു എ ഇയിൽ നിന്നുള്ള യാത്രക്കാരും മുൻകരുതൽ എടുക്കണമെന്ന് അധികൃതർ പറഞ്ഞു. രോഗബാധിത പ്രദേശങ്ങളിലേക്ക് പോകുന്നവർ ആരോഗ്യ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തണം.

വിമാനത്താവളങ്ങളിൽ തെർമൽ സ്‌കാനിംഗ് ഉൾപ്പെടെയുള്ള പരിശോധനകൾ കർശനമാക്കാൻ അധികൃതർ നിർദേശിച്ചു. ഇന്ത്യയിലെ വിവിധ സംസ്ഥാനങ്ങളിൽ നിപ പ്രതിരോധ പ്രവർത്തനങ്ങൾ ശക്തമാക്കിയിട്ടുണ്ട്. യാത്ര കഴിഞ്ഞ് തിരിച്ചെത്തുന്നവർക്ക് പനിയോ മറ്റ് ലക്ഷണങ്ങളോ അനുഭവപ്പെട്ടാൽ ഉടൻ അടുത്തുള്ള ആരോഗ്യ കേന്ദ്രത്തിൽ റിപ്പോർട്ട് ചെയ്യണം. വ്യക്തിശുചിത്വം പാലിക്കുന്നതിലൂടെയും രോഗബാധിതരുമായുള്ള നേരിട്ടുള്ള സമ്പർക്കം ഒഴിവാക്കുന്നതിലൂടെയും വൈറസ് വ്യാപനം തടയാനാകുമെന്ന് മന്ത്രാലയം ഓർമിപ്പിച്ചു.

വവ്വാലുകൾ, പന്നികൾ എന്നിവയിൽ നിന്ന് മനുഷ്യരിലേക്ക് പകരുന്ന വൈറസായതിനാൽ വവ്വാലുകൾ കടിച്ച പഴങ്ങളോ മറ്റോ ഭക്ഷിക്കരുത്. പനി, തലവേദന, ശ്വാസ തടസ്സം എന്നിവയാണ് പ്രധാന ലക്ഷണങ്ങൾ. ഇത്തരം ലക്ഷണങ്ങൾ കണ്ടാൽ ഉടൻ വൈദ്യസഹായം തേടണമെന്നും സമ്പർക്ക വിലക്ക് ഉൾപ്പെടെയുള്ള നിർദേശങ്ങൾ പാലിക്കണമെന്നും ആരോഗ്യ വിദഗ്ധർ അറിയിച്ചു.