heavy hot
കേരളത്തില് ഉയര്ന്ന താപനില തുടരുന്നു; പാലക്കാട് ഉഷ്ണതരംഗ മുന്നറിയിപ്പ്
പാലക്കാട് ഉള്പ്പെടെ 12 ജില്ലകളില് ഞായറാഴ്ച വരെ ചൂട് കൂടാന് സാധ്യതയുണ്ടെന്നാണ് മുന്നറിയിപ്പ്.
കോഴിക്കോട് | കേരളത്തില് ഉയര്ന്ന താപനില തുടരുന്ന സാഹചര്യത്തില് പാലക്കാട് ജില്ലയില് ഉഷ്ണതരംഗ മുന്നറിയിപ്പ് പ്രഖ്യാപിച്ചു. തുടര്ച്ചയായ ദിവസങ്ങളില് അതി തീവ്രമായ ചൂട് രേഖപ്പെടുത്തിയതിന്റേയും അടുത്ത ദിവസങ്ങളിലും 41 ഡിഗ്രി സെല്ഷ്യസ് വരെ താപനില ഉയരുമെന്ന പ്രവചനത്തിന്റെയും അടിസ്ഥാനത്തിലാണ് കേന്ദ്ര കാലാവസ്ഥ വകുപ്പ് ഉഷ്ണ തരംഗ മുന്നറിയിപ്പ് നല്കിയത്.
ഉഷ്ണതരംഗം അതീവ ജാഗ്രത വേണ്ട സാഹചര്യമെന്നും പൊതുജനങ്ങളും ഭരണ ഭരണേതര സംവിധാനങ്ങളും ജാഗ്രത പാലിക്കണമെന്നും ദുരന്തനിവാരണ അതോറിറ്റി നിര്ദ്ദേശിച്ചു.പാലക്കാട് ഉള്പ്പെടെ 12 ജില്ലകളില് ഞായറാഴ്ച വരെ ചൂട് കൂടാന് സാധ്യതയുണ്ടെന്നാണ് മുന്നറിയിപ്പ്. സാധാരണയേക്കാള് രണ്ടു മുതല് നാല് ഡിഗ്രി സെല്ഷ്യസ് വരെ ചൂട് കൂടുമെന്നാണ് മുന്നറിയിപ്പ്.
പാലക്കാട് ഉയര്ന്ന താപനില 41 ഡിഗ്രി സെല്ഷ്യസ് വരെയും കൊല്ലത്ത് 39 ഡിഗ്രി സെല്ഷ്യസ് വരെയും തൃശൂര്, കോഴിക്കോട് ജില്ലകളില് ഉയര്ന്ന താപനില 38 ഡിഗ്രി സെല്ഷ്യസ്വരെയും, ആലപ്പുഴ, പത്തനംതിട്ട, എറണാകുളം, കോട്ടയം, കണ്ണൂര് ജില്ലകളില് 37 ഡിഗ്രി സെല്ഷ്യസ് വരെയും, തിരുവനന്തപുരം, മലപ്പുറം, കാസര്ഗോഡ് ജില്ലകളില് ഉയര്ന്ന താപനില 36 ഡിഗ്രി സെല്ഷ്യസ് വരെയും വര്ധിക്കാന് സാധ്യതയുണ്ട്. സംസ്ഥാനത്ത് വേനല് മഴയും തുടരും.
ഉച്ചയ്ക്ക് ശേഷം മലയോര മേഖലകളില് ഇടിമിന്നലും കാറ്റോടും കൂടിയ വേനല് മഴ ലഭിക്കാനാണ് സാധ്യത. പൊതുജനങ്ങള് ഇടിമിന്നല് ജാഗ്രത നിര്ദ്ദേശങ്ങള് പാലിക്കണം.