ദസ്സാൾട്ട് ഏവിയേഷനും ടാറ്റ ഗ്രൂപ്പും കൈകോർക്കുന്നു; റഫാൽ യുദ്ധവിമാനങ്ങളുടെ ഭാഗങ്ങൾ ഇന്ത്യയിൽ നിർമിക്കും

ബംഗളൂരു | റഫാൽ യുദ്ധവിമാനങ്ങളുടെ ചില ഭാഗങ്ങൾ ഇന്ത്യയിലും മറ്റ് ആഗോള വിപണികളിലും നിർമ്മിക്കുന്നതിനായി റഫാൽ നിർമ്മാതാക്കളായ ദസ്സാൾട്ട് ഏവിയേഷൻ ടാറ്റ ഗ്രൂപ്പുമായി സഹകരിക്കുന്നു. ഈ പങ്കാളിത്തത്തിന്റെ ഭാഗമായി ഹൈദരാബാദിൽ ഒരു നിർമ്മാണ കേന്ദ്രം സ്ഥാപിക്കും.

റഫാൽ യുദ്ധവിമാനത്തിന്റെ ഫ്യൂസ്‌ലേജ് (വിമാനത്തിന്റെ പ്രധാന ഭാഗം) ഇന്ത്യയിൽ നിർമ്മിക്കുന്നതിനായി ദസ്സാൾട്ട് ഏവിയേഷനും ടാറ്റാ അഡ്വാൻസ്ഡ് സിസ്റ്റംസ് ലിമിറ്റഡും നാല് ഉത്പാദന കൈമാറ്റ കരാറുകളിൽ ഒപ്പുവെച്ചു. ഇന്ത്യയുടെ എയ്‌റോസ്‌പേസ് അടിസ്ഥാന സൗകര്യങ്ങളിൽ ഇത് ഒരു വലിയ നിക്ഷേപമാണ്. രാജ്യത്തിന്റെ എയ്‌റോസ്‌പേസ് നിർമ്മാണ ശേഷി ശക്തിപ്പെടുത്തുന്നതിനും ആഗോള വിതരണ ശൃംഖലകളെ പിന്തുണയ്ക്കുന്നതിനും ഇതൊരു സുപ്രധാന ചുവടുവെപ്പാകുമെന്ന് കമ്പനി പ്രസ്താവനയിൽ അറിയിച്ചു.

റഫാലിന്റെ പ്രധാന ഘടനാപരമായ ഭാഗങ്ങളായ റിയർ ഫ്യൂസ്‌ലേജിന്റെ ലാറ്ററൽ ഷെല്ലുകൾ, പൂർണ്ണമായ റിയർ സെക്ഷൻ, സെൻട്രൽ ഫ്യൂസ്‌ലേജ്, ഫ്രണ്ട് സെക്ഷൻ എന്നിവയുടെ നിർമ്മാണത്തിനായി ടാറ്റാ അഡ്വാൻസ്ഡ് സിസ്റ്റംസ് ഹൈദരാബാദിൽ ഒരു അത്യാധുനിക ഉത്പാദന കേന്ദ്രം സ്ഥാപിക്കും. ആദ്യ ഫ്യൂസ്‌ലേജ് ഭാഗങ്ങൾ 2028-ഓടെ അസംബ്ലി ലൈനിൽ നിന്ന് പുറത്തിറങ്ങുമെന്ന് പ്രതീക്ഷിക്കുന്നു. കൂടാതെ ഈ കേന്ദ്രത്തിൽ നിന്ന് പ്രതിമാസം രണ്ട് പൂർണ്ണ ഫ്യൂസ്‌ലേജുകൾ വരെ വിതരണം ചെയ്യാനും കഴിയും.

റഫാൽ ഫ്യൂസ്‌ലേജ് ഫ്രാൻസിന് പുറത്ത് നിർമ്മിക്കുന്നത് ഇത് ആദ്യമായാണ്.