ജാതി സെന്‍സസ്: സര്‍വകക്ഷി യോഗം ആവശ്യപ്പെട്ട് പ്രധാനമന്ത്രിക്ക് ഖാര്‍ഗെയുടെ കത്ത്

ന്യൂഡല്‍ഹി | ജാതിസെന്‍സെസ് നടപ്പാക്കുന്നതുമായി ബന്ധപ്പെട്ട് സര്‍വകക്ഷി യോഗം വിളിക്കണമെന്ന ആവശ്യവുമായി കോണ്‍ഗ്രസ്സ് അധ്യക്ഷന്‍ മല്ലികാര്‍ജുന്‍ ഖാര്‍ഗെ പ്രധാനമന്ത്രി മോദിക്ക് കത്തയച്ചു. ജാതിസെന്‍സെസിനായി മൂന്ന് നിര്‍ദേശങ്ങളാണ് ഖാര്‍ഗെ ഈ മാസം അഞ്ചിനയച്ച കത്തില്‍ മുന്നോട്ടുവെക്കുന്നത്. കത്ത് എക്‌സിലൂടെ ഖാര്‍ഗെ പങ്കുവെച്ചു.

ജാതിസെന്‍സെസിനുള്ള ചോദ്യാവലി തയ്യാറാക്കുകയെന്നത് പ്രധാന്യമര്‍ഹിക്കുന്ന ഒന്നാണെന്ന് കത്തില്‍ ചൂണ്ടിക്കാട്ടുന്നു. ഇതിനായി തെലങ്കാന തയാറാക്കിയ മോഡലിനെ ആശ്രയിക്കാമെന്ന് അദ്ദേഹം പറയുന്നു. ജാതി സെന്‍സസിന്റെ ഫലങ്ങള്‍ എന്തുതന്നെയായാലും പട്ടികജാതി, പട്ടികവര്‍ഗ, ഒബിസി വിഭാഗങ്ങള്‍ക്കുള്ള സംവരണത്തിന് ഏകപക്ഷീയമായി ഏര്‍പ്പെടുത്തിയ 50% പരിധി ഒരു ഭരണഘടനാ ഭേദഗതിയിലൂടെ നീക്കം ചെയ്യണമെന്നും ഖാര്‍ഗെ കത്തില്‍ ആവശ്യപ്പെട്ടിട്ടുണ്ട്.

എസ് സി, എസ് ടി, ഒ ബി സി വിഭാഗങ്ങള്‍ക്ക് സ്വകാര്യസ്ഥാപനങ്ങളില്‍ സംവരണം നല്‍കുന്ന ആര്‍ട്ടിക്കള്‍ 15 (5) നടപ്പാക്കുന്നതിനുള്ള നടപടികള്‍ സ്വീകരിക്കണമെന്നും അദ്ദേഹം ആവശ്യപ്പെട്ടു.