ഉദ്ഘാടനത്തിന് പാർലിമെൻ്റിൽ പശുവിനെ കയറ്റാത്തതിനെതിരെ അവിമുക്തേശ്വരാനന്ദ്; രാജ്യത്തിൻ്റെ വിവിധ ഭാഗങ്ങളിലെ പശുക്കളെ പാർലിമെൻ്റിനകത്ത് കയറ്റുമെന്ന്

ന്യൂഡൽഹി | ഉദ്ഘാടന വേളയിൽ സെൻട്രൽ വിസ്റ്റയിലെ പുതിയ പാർലിമെൻ്റ് മന്ദിരത്തിനുള്ളിലേക്ക് പശുവിനെ പ്രവേശിപ്പിക്കാത്തതിനെതിരെ സംഘ്പരിവാർ സഹയാത്രികൻ ശങ്കരാചാര്യ അവിമുക്തേശ്വരാനന്ദ്. കാലതാമസം ഉണ്ടായാൽ രാജ്യത്തിന്റെ വിവിധ ഭാഗങ്ങളിൽ നിന്ന് ഞങ്ങൾ പശുക്കളെ പാർലിമെന്റിലേക്ക് കൊണ്ടുവരുമെന്ന്  അദ്ദേഹം പറഞ്ഞു.

‘ഒരു പശുവിന്റെ പ്രതിമ പാർലിമെന്റിനുള്ളിൽ കയറ്റാമെങ്കിൽ ജീവനുള്ള ഒരു പശുവിനെ എന്തുകൊണ്ട് അകത്തേക്ക് കൊണ്ടുപോയിക്കൂടാ എന്ന് ശങ്കരാചാര്യർ മാധ്യമപ്രവർത്തകരോട് ചോദിച്ചു. പുതിയ പാർലിമെന്റ് മന്ദിരത്തിലേക്ക് പ്രവേശിക്കുമ്പോൾ പ്രധാനമന്ത്രി നരേന്ദ്ര മോദി കൈവശം വെച്ചിരുന്ന ചെങ്കോലിൽ ഒരു പശുവിന്റെ പ്രതിമ ആലേഖനം ചെയ്തിരുന്നു. ആശീർവാദം നൽകാൻ ഒരു യഥാർഥ പശുവിനെയും കെട്ടിടത്തിലേക്ക് കൊണ്ടുപോകേണ്ടതായിരുന്നുവെന്നും  അദ്ദേഹം ചൂണ്ടിക്കാട്ടി.

ഇന്ത്യയിലെ ഓരോ നിയമസഭാ മണ്ഡലത്തിലും 100 പശുക്കളെ ഉൾക്കൊള്ളുന്ന ഒരു ‘രാമധാം’ എന്ന പേരിൽ ഒരു പശുസംരക്ഷണ കേന്ദ്രം വേണമെന്നും ശങ്കരാചാര്യർ ആവശ്യപ്പെട്ടു. ദിവസേനയുള്ള പശു സേവനം, സംരക്ഷണം, തദ്ദേശീയ ഇനങ്ങളെ പ്രോത്സാഹിപ്പിക്കൽ എന്നിവയിൽ ഷെൽട്ടറുകൾ ശ്രദ്ധ കേന്ദ്രീകരിക്കും. പശുക്കളെ പരിപാലിക്കുമ്പോൾ ഔദ്യോഗിക പ്രോട്ടോക്കോൾ പാലിക്കുന്ന ആളുകൾക്ക് സാമ്പത്തികമായി പ്രതിഫലം ലഭിക്കും. 100 പശുക്കളെ പരിപാലിക്കുന്നവർക്ക് പ്രതിമാസം 2 ലക്ഷം രൂപ നൽകണം.

പശുവിനെ രാഷ്ട്രമാതാവായി പ്രഖ്യാപിക്കണമെന്ന് ആവശ്യപ്പെട്ട ബി ജെ പി എം പി ദർശൻ സിംഗ് ചൗധരിയെ അഭിനന്ദിക്കുന്ന പ്രമേയം ധർമ സൻസദ് പാസാക്കിയതായും ശങ്കരാചാര്യ പറഞ്ഞു. പശുക്കളെ പരിപാലിക്കുകയും അവയെ സംരക്ഷിക്കുന്ന നിയമങ്ങളെ പിന്തുണക്കുകയും ചെയ്യുന്ന സ്ഥാനാർഥികൾക്ക് മാത്രമേ ആളുകൾ വോട്ട് ചെയ്യാവൂ എന്നും അദ്ദേഹം പറഞ്ഞു.