ഇൻഫ്രാ റെഡ് ക്യാമറകളുമായി എയർപോഡ്‌സ് പ്രോ 4 വരുന്നു; വിപ്ലവകരമായ മാറ്റത്തിനൊരുങ്ങി ആപ്പിൾ

വാഷിംഗ്ടൺ | അത്യാധുനിക ഫീച്ചറുകളുമായി ആപ്പിളിന്റെ പുതിയ എയർപോഡ്‌സ് പ്രോ 4 വിപണിയിലേക്ക് എത്തുന്നതായി റിപ്പോർട്ടുകൾ. നിലവിലെ എയർപോഡ്‌സ് പതിപ്പുകളിൽ നിന്നും വ്യത്യസ്തമായി ഇൻഫ്രാറെഡ് ക്യാമറകൾ ഉൾപ്പെടുത്തിയ വലിയൊരു ഹാർഡ്‌വെയർ മാറ്റമാണ് ആപ്പിൾ ലക്ഷ്യമിടുന്നത്. മാക്റൂമേഴ്സ് പുറത്തുവിട്ട റിപ്പോർട്ടുകൾ പ്രകാരം, ഈ പുതിയ സെൻസറുകൾ വഴി എയർപോഡ്‌സിന് ചുറ്റുമുള്ള സാഹചര്യങ്ങൾ തിരിച്ചറിയാൻ സാധിക്കും. ഇത് ഉപയോക്താക്കൾക്ക് കൈകൾ ഉപയോഗിക്കാതെ തന്നെ എയർപോഡ്‌സ് നിയന്ത്രിക്കാൻ സഹായിക്കുന്ന പുതിയ രീതിയിലുള്ള ആശയവിനിമയത്തിന് വഴിയൊരുക്കും.

ആപ്പിൾ വിഷൻ പ്രോ ഇക്കോസിസ്റ്റവുമായി കൂടുതൽ ആഴത്തിൽ ബന്ധിപ്പിക്കുന്നതാകും ഈ പുതിയ പതിപ്പ്. വിഷ്വൽ ഇന്റലിജൻസ് അധിഷ്ഠിതമായ ആർട്ടിഫിഷ്യൽ ഇന്റലിജൻസ് സാങ്കേതികവിദ്യ എയർപോഡ്‌സുകളിൽ ലഭ്യമാക്കുക എന്നതാണ് പുതിയ ഐ ആർ ക്യാമറകളുടെ പ്രധാന ലക്ഷ്യം. എയർപോഡ്‌സിന്റെ ചരിത്രത്തിലെ തന്നെ ഏറ്റവും പ്രധാനപ്പെട്ട മാറ്റങ്ങളിലൊന്നാണ് ഇൻഫ്രാറെഡ് സാങ്കേതികവിദ്യയുടെ കടന്നുവരവ്.

ഹെഡ്‌സെറ്റിൽ സ്പർശിക്കാതെ തന്നെ വായുവിൽ കൈകൾ ചലിപ്പിച്ചുകൊണ്ട് വോളിയം ക്രമീകരിക്കാനും പാട്ടുകൾ മാറ്റാനും ഈ മിനിയേച്ചർ ക്യാമറ മോഡ്യൂളുകൾ സഹായിക്കും. കൂടാതെ ഉപയോക്താവിന്റെ സ്ഥാനവും സാഹചര്യവും കൂടുതൽ കൃത്യമായി മനസ്സിലാക്കി മികച്ച സ്പേഷ്യൽ ഓഡിയോ അനുഭവം നൽകാനും ഇതിന് സാധിക്കും.

സാധാരണയായി മൂന്ന് വർഷത്തെ ഇടവേളയിൽ ഓഡിയോ ഉൽപ്പന്നങ്ങൾ പുതുക്കാറുള്ള ആപ്പിൾ, 2026 ലായിരിക്കും ഈ പ്രോ പതിപ്പ് പുറത്തിറക്കുക. ഇത് എയർപോഡ്‌സ് പ്രോ 4 എന്ന പേരിലാണോ അതോ എയർപോഡ്‌സ് പ്രോ 3 യുടെ പ്രീമിയം പതിപ്പായിട്ടാണോ വരിക എന്നതിൽ ഇപ്പോഴും വ്യക്തതയില്ല. ഏകദേശം 249 യു എസ് ഡോളർ വില പ്രതീക്ഷിക്കുന്ന ഈ ഉൽപ്പന്നം 2026 രണ്ടാം പകുതിയോടെ വിപണിയിലെത്താനാണ് സാധ്യത.