അഹമ്മദാബാദ് ദുരന്തം: ബോയിംഗ് ഡ്രീംലൈനർ 787-8 സീരീസ് വിമാനങ്ങൾ പിൻവലിക്കാൻ കേന്ദ്രം ആലോചിക്കുന്നു

ന്യൂഡൽഹി | അഹമ്മദാബാദിൽ എയർ ഇന്ത്യയുടെ ബോയിംഗ് ഡ്രീംലൈനർ 787-8 വിമാനം തകർന്നുവീണതിന് പിന്നാലെ, ഈ ശ്രേണിയിലുള്ള വിമാനങ്ങൾ തത്കാലം പിൻവലിക്കാൻ കേന്ദ്രസർക്കാർ ആലോചിക്കുന്നതായി റിപ്പോർട്ടുകൾ. അമേരിക്കൻ വൈഡ്-ബോഡി വിമാനത്തിന്റെ സുരക്ഷാ പരിശോധനയ്ക്കായി ഈ ശ്രേണിയിലുള്ള വിമാനങ്ങൾ താൽക്കാലികമായി നിർത്തിവെച്ചേക്കുമെന്നും, ഇതിനെക്കുറിച്ച് ഇന്ത്യയും യുഎസ് ഏജൻസികളും തമ്മിൽ ചർച്ചകൾ നടക്കുന്നുണ്ടെന്നും വൃത്തങ്ങൾ കൂട്ടിച്ചേർത്തു.

അപകടത്തെക്കുറിച്ചുള്ള അന്വേഷണത്തിന്റെ അടിസ്ഥാനത്തിലായിരിക്കും അന്തിമ തീരുമാനമെന്ന് ഒരു ഉദ്യോഗസ്ഥൻ പറഞ്ഞു. കൂടാതെ, വിമാന പരിപാലനത്തിനായുള്ള എയർ ഇന്ത്യയുടെ സ്റ്റാൻഡേർഡ് ഓപ്പറേറ്റിംഗ് നടപടിക്രമങ്ങളും സൂക്ഷ്മപരിശോധനയ്ക്ക് വിധേയമാക്കുമെന്നും ഉദ്യോഗസ്ഥർ സൂചന നൽകി.

വ്യാഴാഴ്ച ലണ്ടനിലേക്ക് പുറപ്പെട്ട എയർ ഇന്ത്യ വിമാനം AI 171 സർദാർ വല്ലഭായ് പട്ടേൽ അന്താരാഷ്ട്ര വിമാനത്താവളത്തിൽ നിന്ന് പറന്നുയർന്ന് നിമിഷങ്ങൾക്കകം തകരുകയായിരുന്നു. വിമാനത്തിലുണ്ടായിരുന്ന 242 യാത്രക്കാരിലും ജീവനക്കാരിലും ഒരാൾ മാത്രമാണ് ദുരന്തത്തിൽ നിന്ന് രക്ഷപ്പെട്ടത്. ബോയിംഗ് ഡ്രീംലൈനർ 787-8 ശ്രേണിയിൽപ്പെട്ടതാണ് ഈ വിമാനം.

ദീർഘദൂര, വൈഡ്-ബോഡി വിമാനമാണ് ബോയിംഗ് 787 ഡ്രീംലൈനർ. അന്താരാഷ്ട്ര യാത്രകൾക്കായാണ് ഇത് വിമാനക്കമ്പനികൾ ഉപയോഗിക്കുന്നത്. 2011 ഒക്ടോബർ 26-ന് ഓൾ നിപ്പോൺ എയർവേസ് വിമാനം ടോക്കിയോ നരിറ്റയിൽ നിന്ന് ഹോങ്കോങ്ങിലേക്ക് പറന്നതാണ് ബോയിംഗ് 787 ഡ്രീംലൈനറിന്റെ ആദ്യ യാത്ര. ബോയിംഗിന്റെ വെബ്സൈറ്റിൽ ലഭ്യമായ വിവരമനുസരിച്ച്, 14 വർഷത്തിനുള്ളിൽ ഒരു ബില്യൺ യാത്രക്കാർ 787 ഡ്രീംലൈനറിൽ യാത്ര ചെയ്തിട്ടുണ്ട്. വ്യോമയാന ചരിത്രത്തിൽ മറ്റൊരു വൈഡ്‌ബോഡി വിമാനവും ഇത്ര ചുരുങ്ങിയ കാലത്തിനിടക്ക് ഇത്രയും നേട്ടമുണ്ടാക്കിയിട്ടില്ല.

2011-ൽ സർവീസ് ആരംഭിച്ചതുമുതൽ വ്യാഴാഴ്ച വരെ മാരകമായ അപകടങ്ങളിലും ഈ വിമാനം ഉൾപ്പെട്ടിരുന്നില്ല. ബോയിംഗ് 787 ശ്രേണിയിൽ നിലവിൽ മൂന്ന് മോഡലുകളുണ്ട്. ബോയിംഗ് 787-8 ഏറ്റവും ചെറുതും ആദ്യമായി അവതരിപ്പിച്ചതുമാണ്. 787-8-ന് 248 യാത്രക്കാരെ വഹിക്കാൻ കഴിയും. കൂടുതൽ ദൂരപരിധിയുള്ള 787-9-ന് 296 യാത്രക്കാരെ ഉൾക്കൊള്ളാൻ കഴിയും. മൂന്നിൽ ഏറ്റവും വലുതും ഏറ്റവും കുറഞ്ഞ ദൂരപരിധിയുള്ളതുമായ 787-10-ൽ 336 പേർക്ക് യാത്ര ചെയ്യാം.

ഈ മോഡൽ അവതരിപ്പിച്ചതിന് ശേഷം ബോയിംഗ് 2,500-ൽ അധികം 787 വിമാനങ്ങൾ വിറ്റഴിച്ചിട്ടുണ്ട്. 47 എണ്ണം എയർ ഇന്ത്യയാണ് വാങ്ങിയത്.