പാലക്കാട് 25കാരി ഭര്‍തൃവീട്ടില്‍ മരിച്ച നിലയില്‍; ഭര്‍ത്താവ് കസ്റ്റഡിയില്‍

പാലക്കാട്| പാലക്കാട് 25കാരിയെ ഭര്‍തൃവീട്ടില്‍ മരിച്ച നിലയില്‍ കണ്ടെത്തി. പാലക്കാട് വടക്കഞ്ചേരി കാരപ്പറ്റ കുന്നുംപള്ളി നേഖ സുബ്രഹ്മണ്യനെ(25)യാണ് ആലത്തൂര്‍ തോണിപ്പാടത്തെ ഭര്‍തൃവീട്ടില്‍ മരിച്ച നിലയില്‍ കണ്ടെത്തിയത്. മരണത്തില്‍ അസ്വാഭാവികത തോന്നിയ ആശുപത്രി അധികൃതര്‍ പോലീസില്‍ വിവരം അറിയിക്കുകയായിരുന്നു. പിന്നാലെ സംഭവത്തില്‍ ദുരൂഹത ആരോപിച്ച് നേഖയുടെ ബന്ധുക്കളും രംഗത്തെത്തി. സംഭവത്തില്‍ അസ്വാഭാവിക മരണത്തിന് ആലത്തൂര്‍ പോലീസ് കേസെടുത്തു. ഭര്‍ത്താവ് ആലത്തൂര്‍ തോണിപ്പാടം കല്ലിങ്ങല്‍ വീട്ടില്‍ പ്രദീപനെ കസ്റ്റഡിയിലെടുത്ത് ചോദ്യം ചെയ്ത് വരികയാണ്.

നേഖയെ ഭര്‍ത്താവ് ഉപദ്രവിച്ചിരുന്നുവെന്ന് നേഖയുടെ മാതാവ് പറഞ്ഞു. മകള്‍ ആത്മഹത്യ ചെയ്യില്ല. മകളെ കൊന്നതാണ്. ഭര്‍ത്താവിനെതിരെ നിയമനടപടികളുമായി മുന്നോട്ട് പോകുമെന്നും ബന്ധുക്കള്‍ അറിയിച്ചു.

ആറുവര്‍ഷം മുമ്പാണ് നേഖയുടെയും പ്രദീപിന്റെയും വിവാഹം നടന്നത്. രണ്ടു വര്‍ഷങ്ങള്‍ക്കുശേഷമാണ് ഇവര്‍ക്ക് മകളുണ്ടായത്. മക്കളില്ലാത്തതുമായി ബന്ധപ്പെട്ട് നേരത്തെയും പ്രദീപ് മര്‍ദിച്ചിരുന്നുവെന്ന് ബന്ധുക്കള്‍ ആരോപിക്കുന്നു. മൃതദേഹം പോസ്റ്റ്‌മോര്‍ട്ടത്തിനു ശേഷമേ വ്യക്തമായ വിവരം ലഭിക്കുകയുള്ളൂവെന്ന് പോലീസ് വ്യക്തമാക്കി.