Kerala
2025 ഓടെ സംസ്ഥാനത്തു നിന്നും ബാലവേല പൂര്ണമായും ഇല്ലാതാക്കും: മന്ത്രി വീണ ജോര്ജ്
പത്തനംതിട്ട | ഇന്ത്യയില് എട്ടുകോടിയിലേറെ കുഞ്ഞുങ്ങള് ബാലവേല ചെയ്യുന്നതായി മന്ത്രി വീണ ജോര്ജ്. ശരണ ബാല്യം പദ്ധതിയുടെ ഭാഗമായി പത്തനംതിട്ട ജില്ലയെ പൂര്ണ്ണമായും ബാലവേല വിമുക്തമാക്കുന്നതിനായി പരിപാടിയുടെ ജില്ലാതല ഉദ്ഘാടനം നിര്വഹിക്കുകയായിരുന്നു മന്ത്രി. 2025 ഓടെ സംസ്ഥാനത്തു നിന്നും ബാലവേല പൂര്ണമായും ഇല്ലാതാക്കുകയാണ് സര്ക്കാര് ലക്ഷ്യമെന്നും മന്ത്രി പറഞ്ഞു.
ലോകത്ത് ആറു കുഞ്ഞുങ്ങളില് ഒരാള് തൊഴിലാളിയാണെന്നും മന്ത്രി ചൂണ്ടിക്കാട്ടി. ശബരിമല മണ്ഡലകാലത്ത് കുഞ്ഞുങ്ങളെ ബാലവേല ചെയ്യിക്കുന്നതു ശ്രദ്ധയില്പ്പെട്ടതോടെയാണ് പത്തനംതിട്ട ജില്ലയില് ശരണ ബാല്യം പദ്ധതിക്കു തുടക്കമാവുന്നത്. പത്തനംതിട്ട ജില്ലയില് മാത്രം 85 കുഞ്ഞുങ്ങളെ ഈ പദ്ധതിയില് ഉള്പ്പെടുത്തി വിമുക്തരാക്കിയിട്ടുണ്ട്. തുടര്ന്ന് ബാലവേല, ബാലഭിക്ഷാടനം, ബാലചൂഷണം, തെരുവ് ബാല്യവിമുക്ത കേരളം എന്നീ ലക്ഷ്യങ്ങളോടെ സംസ്ഥാനത്തൊട്ടാകെ പദ്ധതി വ്യാപിപ്പിച്ചു.
“ആക്ട് നൗ എന്ഡ് ചൈല്ഡ് ലേബര്” എന്നതാണ് ഈ വര്ഷത്തെ തീം. ബാലവേല നിരോധിക്കുകയെന്ന എന്ന ലക്ഷ്യത്തോടെ ആസൂത്രണം ചെയ്യുന്ന ഈ പരിപാടി കൂടുതല് മികച്ച രീതിയില് ചെയ്യാന് കഴിയട്ടെയെന്നും മന്ത്രി പറഞ്ഞു.