വാക്‌സിനെടുത്തവര്‍ക്ക് കൊവിഡ് വരുമോ?; കണക്കുകള്‍ പുറത്തുവിട്ട് കേന്ദ്ര സര്‍ക്കാര്‍

ന്യൂഡല്‍ഹി | വാക്സിനെടുത്തവര്‍ക്ക് കൊവിഡ് ബാധിക്കാനുള്ള സാധ്യത എത്രയെന്ന കണക്കുകളുമായി കേന്ദ്ര സര്‍ക്കാര്‍. പതിനായിരം പേര്‍ക്ക് കൊവിഡ് ബാധിക്കുമ്പോള്‍ അതില്‍ വാക്സിന്‍ സ്വീകരിച്ച രണ്ട് മുതല്‍ നാല് പേര്‍ക്ക് മാത്രമേ വൈറസ് ബാധയേല്‍ക്കുന്നുള്ളു. വളരെ ചെറിയ ശതമാനം പേര്‍ക്ക് മാത്രമേ വാക്സിനേഷന് ശേഷവും കൊവിഡ് ബാധിക്കുകയുള്ളുവെന്നും അതുകൊണ്ട് ആശങ്കപ്പെടേണ്ടതില്ലെന്നും ഐസിഎംആര്‍ ഡയറക്ടര്‍ ജനറല്‍ ബല്‍റാം ഭാര്‍ഗവ അറിയിച്ചു.

ഭാരത് ബയോട്ടെക്കിന്റെ ആദ്യ ഡോസ് കൊവിഡ് വാക്സിന്‍ (കൊവാക്സിന്‍) ലഭിച്ച 0.04 ശതമാനം പേര്‍ക്ക് മാത്രമേ കൊവിഡ് ബാധിച്ചിട്ടുള്ളു. അതായത് ആദ്യ ഡോസ് വാക്സിനെടുത്ത 93,56,436 പേരില്‍ കൊവിഡ് ബാധിച്ചത് 4,208 പേര്‍ക്ക് മാത്രമാണ്. രണ്ടാം ഡോസ് സ്വീകരിച്ച 17,37,178 പേരില്‍ 695 പേര്‍ക്ക് മാത്രമാണ് കൊവിഡ് ബാധിച്ചത്.

സെറം ഇന്‍സ്റ്റിറ്റ്യൂട്ടിന്റെ കൊവിഷീല്‍ഡ് വാക്സിനെടുത്ത 0.02 ശതമാനം പേര്‍ക്ക് മാത്രമേ കൊവിഡ് ബാധിച്ചിട്ടുള്ളു. ആദ്യ ഡോസ് കൊവിഷീല്‍ഡ് വാക്സിനെടുത്ത 10,03,02,745 പേരില്‍ 17,145 പേര്‍ക്ക് മാത്രമേ കൊവിഡ് ബാധിച്ചുള്ളു. രണ്ടാം ഡോസ് വാക്സിനെടുത്ത 1,57,32,754 പേരില്‍ 5,014 പേരില്‍ മാത്രമാണ് വൈറസ് ബാധ സ്ഥിരീകരിച്ചത്.