International
സംഘട്ടനം ഇരുകൂട്ടര്ക്കും നല്കുക വിനാശം മാത്രം; അമേരിക്കയെ ഓര്മപ്പെടുത്തി ചൈന
ബീജിംഗ് | ചൈനയെ നേരിടുന്നതിന് പുതിയ തന്ത്രങ്ങള് ആവിഷ്ക്കരിക്കാന് അമേരിക്ക നീക്കങ്ങള് നടത്തുന്നതിടെ സംഘട്ടനം ഇരൂകൂട്ടര്ക്കും നാശം മാത്രമാണ് നല്കുയെന്ന് ഉണര്ത്തി ചൈനീസ് പ്രസിഡന്റ് ഷി ജിന്പിംഗ്. തര്ക്കങ്ങള് ചര്ച്ചയിലൂടെ പരിഹരിച്ച് മുന്നോട്ട് പോകുന്നതാണ് ഇരുകൂട്ടര്ക്കും നല്ലതെന്നും ഷി ജിന് പിംഗ് പറഞ്ഞു. അമേരിക്കന് പ്രസിഡന്റ് ബൈഡനുമായി ടെലഫോണില് സംസാരിക്കവെയാണ് പിംഗ് നിലപാട് വ്യക്തമാക്കിയത്.
ചൈനയുമായി കടുത്ത മത്സരത്തിന് അമേരിക്ക തയ്യാറെടുക്കുകയാണെന്ന് അമേരിക്കന് പ്രസിഡന്ര് ജോ ബൈഡന് ഇന്നലെ വ്യക്തമാക്കിയിരുന്നു. ഇതിനായി പ്രത്യേക പദ്ധതി തയ്യാറാകുന്നുണ്ട്. ഷി ജിന് പിംഗിനെ എനിക്ക് നന്നായി അറിയാം. അദ്ദേഹം വലിയ ബുദ്ധിശാലിയും കര്ക്കശക്കാരനുമാണ്. പക്ഷേ അദ്ദേഹത്തിന് ജനാധിപത്യത്തിന്റെ ഒരെല്ലില്ല. ഇതൊരു വിമര്ശനമായി പറയുന്നതല്ല, ഇതാണ് യാഥാര്ത്ഥ്യം എന്നും ബൈഡന് കുറ്റപ്പെടുത്തിയിരുന്നു.
അമേരിക്കയില് ട്രംപ് ഭരണകാലത്താണ് ചൈനീസ് വിരോധം ഏറ്റവും ശക്തമായത്. അമേരിക്കന് തിരഞ്ഞെടുപ്പ് പ്രചാരണങ്ങളില് ട്രംപ് കേന്ദ്രീകരിച്ചത് പ്രധാനമായും ചൈനീസ് വിമര്ശനമായിരുന്നു. ട്രംപിന്റെ സമാനമായ ഒരു പ്രതികരണമാണ് ഇപ്പോള് ബൈഡനും നടത്തിയിരിക്കുന്നത്. ലോകത്തെ ഏറ്റവും വലിയ സാമ്പത്തിക ശക്തിയായ ചൈനയും അമേരിക്കയും തമ്മിലുള്ള സംഘര്ഷം അന്താരാഷ്ട്ര തലത്തില് വലിയ പ്രതിസന്ധി ഭാവിയില് സൃഷ്ടിക്കുമെന്ന കാര്യം ഉറപ്പാണ്.