എംഡിഎംഎ കേസില്‍ കസ്റ്റഡിയിലെടുത്ത പ്രതിയെ പോലീസ് സ്‌റ്റേഷനില്‍ നിന്നും ഭാര്യ സ്‌കൂട്ടറില്‍ കടത്തി

കൊല്ലം |   കിളികൊല്ലൂരില്‍ മയക്കുമരുന്ന് കേസ് പ്രതി പോലീസ് സ്‌റ്റേഷനില്‍ നിന്നും ഭാര്യയുടെ സഹായത്തോടെ രക്ഷപ്പെട്ടു. എംഡിഎംഎ കേസില്‍ പ്രതിയായ അജു മണ്‍സൂര്‍ (26) ആണ് രക്ഷപ്പെട്ടത്.

സ്ഥിരം മയക്കുമരുന്ന് കേസ് പ്രതിയായ അജുവിനെ ഇന്നലെയാണ് പോലീസ് കസ്റ്റഡിയിലെടുത്തത്. കിളികൊല്ലൂര്‍ സ്റ്റേഷനില്‍  നടപടി ക്രമങ്ങള്‍ പൂര്‍ത്തിയാക്കുന്നതിനിടെയായിരുന്നു നാടകീയമായ രക്ഷപ്പെടല്‍. പോലീസിന്റെ കണ്ണുവെട്ടിച്ച് ഇയാള്‍ സ്റ്റേഷനില്‍ നിന്ന് പുറത്തേക്ക് ഓടുകയും സ്റ്റേഷന് മുന്നില്‍ സ്‌കൂട്ടറില്‍ കാത്തുനിന്ന ഭാര്യയുടെ വണ്ടിയിലേക്ക് ചാടിക്കയറി രക്ഷപ്പെടുകയായിരുന്നു

ഇന്നലെ രാത്രി മുഴുവന്‍ പോലീസ് തിരച്ചില്‍ നടത്തിയിട്ടും അജു മണ്‍സൂറിനേയും ഭാര്യ ബിന്‍ഷയേയും കണ്ടെത്താനായില്ല. . പ്രതിയുടെ ഭാര്യയ്ക്കെതിരെയും ചില എംഡിഎംഎ കേസുകള്‍ ഉണ്ടെന്നാണ് പൊലീസ് പറയുന്നത്. ഇരുവരും ചേര്‍ന്ന് കൊല്ലം നഗരത്തില്‍ ഏറെ നാളുകളായി എംഡിഎംഎ വില്‍പ്പന നടത്തി വരികയായിരുന്നു