Tax-free Income | ഈ 5 സ്രോതസ്സുകളിൽ നിന്ന് ലക്ഷങ്ങൾ സമ്പാദിക്കാം; ഒരു രൂപ പോലും നികുതി നൽകേണ്ട!

സാമ്പത്തിക ബാധ്യതകൾ കുറയ്ക്കാനും കൃത്യമായ നികുതി ആസൂത്രണം നടത്താനും ആഗ്രഹിക്കുന്ന ഏതൊരു നികുതിദായകനും അറിഞ്ഞിരിക്കേണ്ട പ്രധാന കാര്യമാണ് നികുതിരഹിത വരുമാന മാർഗ്ഗങ്ങൾ. ഇൻകം ടാക്സ് റിട്ടേൺ (Income Tax Return) ഫയൽ ചെയ്യുമ്പോൾ ഭൂരിഭാഗം ആളുകളും ഡിഡക്ഷനുകളിലും എക്സംപ്ഷനുകളിലും മാത്രം ശ്രദ്ധ കേന്ദ്രീകരിക്കുമ്പോൾ, പൂർണ്ണമായും നികുതി ഒഴിവാക്കപ്പെട്ട ചില വരുമാന സ്രോതസ്സുകളെ കുറിച്ച് അറിഞ്ഞിരിക്കാറില്ല. ഇന്ത്യൻ സാമ്പത്തിക നിയമങ്ങൾ അനുസരിച്ച് പൂർണ്ണമായും Tax-free Income ലഭിക്കുന്ന പ്രധാന അഞ്ച് വരുമാന സ്രോതസ്സുകൾ പരിശോധിക്കാം.

നികുതി നിയമങ്ങൾ അനുസരിച്ച് താഴെ പറയുന്ന അഞ്ച് സ്രോതസ്സുകളിൽ നിന്നുള്ള വരുമാനത്തിന് നികുതി നൽകേണ്ടതില്ല:

ബന്ധുക്കളിൽ നിന്നുള്ള സമ്മാനങ്ങൾ

നിയമത്തിൽ പരാമർശിച്ചിട്ടുള്ള പങ്കാളി, മാതാപിതാക്കൾ, ഇൻ-ലോസ് തുടങ്ങിയ നിർദ്ദിഷ്ട ബന്ധുക്കളിൽ നിന്ന് ലഭിക്കുന്ന സമ്മാനങ്ങൾക്ക് (Gifts Received from Specified Relatives) മൂല്യം എത്രയായാലും പൂർണ്ണ നികുതി ഇളവുണ്ട്. വിവാഹം പോലുള്ള പ്രത്യേക അവസരങ്ങളിൽ ബന്ധുക്കളല്ലാത്തവരിൽ നിന്ന് ലഭിക്കുന്ന പണത്തിനും സമ്മാനങ്ങൾക്കും ഇതു ബാധകമാണ്. എന്നാൽ, ബന്ധുക്കളല്ലാത്ത വ്യക്തികളിൽ നിന്ന് ലഭിക്കുന്ന പണം, സ്ഥാവര ജംഗമ വസ്തുക്കൾ എന്നിവയുടെ മൂല്യം 50,000 രൂപയിൽ കൂടുതലാണെങ്കിൽ അതിന് പൂർണ്ണമായി നികുതി നൽകേണ്ടി വരും.

കാർഷിക വരുമാനം

ആദായനികുതി നിയമത്തിലെ സെക്ഷൻ 10(1) പ്രകാരം ഇന്ത്യയിലുള്ള കാർഷിക ഭൂമിയിൽ നിന്നുള്ള വരുമാനത്തിന് (Agriculture Income) പൂർണ്ണമായും നികുതി ഇളവുണ്ട്. കൃഷി, കാർഷിക ഉൽപ്പന്നങ്ങളുടെ വിൽപ്പന, കൃഷിഭൂമിയിൽ നിന്നുള്ള വാടക എന്നിവ ഇതിൽ ഉൾപ്പെടുന്നു. എന്നാൽ ഇന്ത്യക്ക് പുറത്തുള്ള ഭൂമിയിൽ നിന്നുള്ള കാർഷിക വരുമാനത്തിന് ഇന്ത്യൻ നിവാസികൾ നികുതി നൽകണം.

പാരമ്പര്യ സ്വത്ത്

ഒരാളുടെ മരണശേഷം വില്ല് വഴിയോ പാരമ്പര്യമായോ (Inheritance) ലഭിക്കുന്ന സ്വത്തുക്കൾക്ക് നികുതി ഈടാക്കില്ല. ഇത്തരം സ്വത്തുക്കൾ സ്വീകരിക്കുന്ന സമയത്ത് നികുതി നൽകേണ്ടതില്ലെങ്കിലും, പാരമ്പര്യമായി ലഭിച്ച സ്വത്തിൽ നിന്ന് പിന്നീട് വരുമാനം ഉണ്ടാക്കുകയാണെങ്കിൽ (ഉദാഹരണത്തിന് വാടക വരുമാനം) ആ വരുമാനത്തിന് നികുതി നൽകേണ്ടി വരും.

നികുതി ഇളവുള്ള പലിശ വരുമാനങ്ങൾ

ചില നിശ്ചിത സമ്പാദ്യ നിക്ഷേപ പദ്ധതികളിൽ നിന്നുള്ള പലിശയ്ക്കും മെച്യൂരിറ്റി തുകയ്ക്കും നികുതിയില്ല (Exempt Interest Income). സുകന്യ സമൃദ്ധി യോജന, പബ്ലിക് പ്രൊവിഡന്റ് ഫണ്ട് (PPF), എംപ്ലോയീസ് പ്രൊവിഡന്റ് ഫണ്ട് (EPF), വോളന്ററി പ്രൊവിഡന്റ് ഫണ്ട് (VPF) എന്നിവ ഇതിൽ ഉൾപ്പെടുന്നു. എന്നാൽ മെച്യൂരിറ്റി കാലാവധിക്ക് ശേഷമുള്ള പിൻവലിക്കലുകൾക്ക് മാത്രമേ ഈ ആനുകൂല്യം ലഭിക്കൂ. കാലാവധിക്ക് മുമ്പുള്ള പിൻവലിക്കലുകൾക്ക് നികുതിയും പിഴയും ഈടാക്കാം. പബ്ലിക് പ്രൊവിഡന്റ് ഫണ്ട് അക്കൗണ്ടിൽ പ്രതിവർഷം 500 രൂപ മുതൽ 1,50,000 രൂപ വരെ നിക്ഷേപിക്കാം. 15 വർഷത്തെ ലോക്ക്-ഇൻ കാലാവധിയുള്ള ഇതിന് നിലവിൽ 7.1 ശതമാനം വാർഷിക പലിശ ലഭിക്കുന്നുണ്ട്. ഇ ഇ ഇ (EEE) സ്റ്റാറ്റസ് ഉള്ളതിനാൽ ഇതിന്റെ സംഭാവനകൾക്ക് സെക്ഷൻ 80 സി പ്രകാരം നികുതി ഇളവ് ലഭിക്കുകയും പലിശയും മെച്യൂരിറ്റി തുകയും പൂർണ്ണമായി നികുതിരഹിതമായിരിക്കുകയും ചെയ്യും.

ലൈഫ് ഇൻഷുറൻസ് മെച്യൂരിറ്റി തുക

സെക്ഷൻ 10(10D) പ്രകാരം ലൈഫ് ഇൻഷുറൻസ് മെച്യൂരിറ്റി തുകയും (Life Insurance Maturity Proceeds) ബോണസും നികുതിരഹിതമാണ്. 2012 ഏപ്രിൽ 1-ന് ശേഷം എടുത്ത പോളിസികൾക്ക് വാർഷിക പ്രീമിയം സം അഷ്വേർഡിന്റെ 10 ശതമാനത്തിൽ കൂടരുത് എന്ന നിബന്ധനയുണ്ട്. യു എൽ ഐ പി (ULIP), എൻഡോവ്മെന്റ് പോളിസികൾ, പരമ്പരാഗത ഇൻഷുറൻസുകൾ എന്നിവയ്ക്ക് ഇത് ബാധകമാണ്.

Content Highlights

Indian tax laws offer complete exemptions on specific income sources including gifts from specified relatives, agricultural income, inheritances, proceeds from life insurance policies, and interest from government savings schemes like PPF. Understanding these tax-free sources helps taxpayers reduce liabilities legally.