കോഴിക്കോട് നഗരത്തില്‍ 19 പേരെ കടിച്ച തെരുവുനായക്ക് പേ വിഷബാധ

കോഴിക്കോട് | കോഴിക്കോട് നടക്കാവില്‍ 19 കടിച്ച് പരുക്കേല്‍പ്പിച്ച തെരുവുനായക്ക് പേ വിഷബാധ സ്ഥിരീകരിച്ചു. പോസ്റ്റ്‌മോര്‍ട്ടംസ റിപോര്‍ട്ടിലാണ് പേവിഷബാധ കണ്ടെത്തിയത്. കഴിഞ്ഞ ചൊവ്വാഴ്ചയാണ് അശോകപുരം ഭാഗത്ത് ഒമ്പത് മണിക്കൂറിനിടെ 19 പേരെ നായ ആക്രമിച്ചത്. നാല് വയസ്സുള്ള കുട്ടിക്ക് ഉള്‍പ്പെടെ നായയുടെ കടിയേറ്റിരുന്നു. എല്ലാവരും കോഴിക്കോട് ബീച്ച് ആശുപത്രിയിലെത്തി ചികിത്സതേടി. പിന്നീട് ചത്തനിലയില്‍ കണ്ടെത്തിയ നായയെ കണ്ണൂരിലെ ലബോറട്ടിയിലെത്തിച്ചാണ് പോസ്റ്റ്‌മോര്‍ട്ടം നടത്തിയത്.

പേവിഷ ബാധ സ്ഥിരീകരിച്ചതോടെ ആശങ്ക ഇരട്ടിയായി. മറ്റ് ജീവികളെ പേവിഷബാധയേറ്റ നായ കടിച്ചിരുന്നോയെന്ന് കോഴിക്കോട് കോര്‍പറേഷന്‍ അധികൃതര്‍ അന്വേഷണം തുടങ്ങി. നായ ആക്രമണം രൂക്ഷമായ സാഹചര്യത്തില്‍ കോര്‍പറേഷന്‍ നായകള്‍ക്ക് പ്രതിരോധ കുത്തിവെപ്പ് ക്യാമ്പയിന്‍ തുടങ്ങി. ഇതുവരെ 52 തെരുവുനായകളെ കുത്തിവെപ്പിന് വിധേയമാക്കി.

കഴിഞ്ഞ രണ്ടാഴ്ച മുമ്പ് കണ്ണൂര്‍ നഗരത്തിലും തെരുവുനായ ആക്രമണത്തില്‍ എഴുപതിലേറെ പേര്‍ക്ക് പരുക്കേറ്റിരുന്നു. മെയ് 31ന് കണ്ണൂര്‍ പയ്യാമ്പലം ബീച്ചിനടത്തെ ക്വാര്‍ട്ടേഴ്‌സിന് മുമ്പില്‍ വെച്ച് നായയുടെ കടിയേറ്റ അഞ്ച് വയസ്സുകാരന്‍ ഇന്ന് രാവിലെ ചികിത്സക്കിടെ മരണപ്പെട്ടിരുന്നു. പരിയാരം മെഡി. കോളജില്‍ ചികിത്സയിലുണ്ടായിരുന്ന തമിഴ്നാട് സ്വദേശികളുടെ മകന്‍ ഹരിത്താണ് മരിച്ചത്. വാക്‌സീനുള്‍പ്പെടെ എടുത്തിരുന്നെങ്കിലും കുട്ടിയെ രക്ഷിക്കാനായില്ല.