"വൺ ബില്യൺ മീൽസ്' പദ്ധതി: 65 രാജ്യങ്ങളിൽ ഭക്ഷണ വിതരണം ചെയ്ത് യു എ ഇ

ദുബൈ | വൺ ബില്യൺ മീൽസ് പദ്ധതി പൂർണമായി പൂർത്തിയാക്കിയതായി യു എ ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് അൽ മക്തൂം പ്രഖ്യാപിച്ചു. “മൂന്ന് വർഷം മുമ്പ്, ലോകമെമ്പാടുമുള്ള ആവശ്യക്കാർക്ക് ഒരു ബില്യൺ ഭക്ഷണം നൽകുന്നതിനുള്ള ഞങ്ങളുടെ മാനുഷിക പദ്ധതി ഞങ്ങൾ ആരംഭിച്ചു. അല്ലാഹുവിന് നന്ദി, ഈ മാസം പദ്ധതി പൂർണമായും പൂർത്തിയായി. ലോകമെമ്പാടുമുള്ള 65 രാജ്യങ്ങളിലായി ഒരു ബില്യൺ ഭക്ഷണം വിതരണം ചെയ്തു. അടുത്ത വർഷം 260 ദശലക്ഷം ഭക്ഷണം കൂടി വിതരണം ചെയ്യും.’ ശൈഖ് മുഹമ്മദ് വ്യക്തമാക്കി.

നൽകുന്നതിന്റെ അനുഗ്രഹത്തിനും വാഗ്ദാനങ്ങൾ പാലിക്കുന്നതിന്റെ അനുഗ്രഹത്തിനും ലോകമെമ്പാടും നന്മ വ്യാപിപ്പിച്ച ഈ നല്ല രാജ്യത്തിന്റെ അനുഗ്രഹത്തിനും ദൈവത്തിന് നന്ദി പറയുന്നുവെന്നും ശൈഖ് മുഹമ്മദ് കൂട്ടിച്ചേർത്തു. ദൈവം യു എ ഇയെയും അതിലെ ജനങ്ങളെയും സംരക്ഷിക്കുകയും അവരെ നന്മയുടെ പ്രതീകമായും ലക്ഷ്യസ്ഥാനമായും നിലനിർത്തുകയും ചെയ്യട്ടെ എന്നും അദ്ദേഹം പ്രാർഥിച്ചു.

വരും വർഷങ്ങളിൽ ലോകമെമ്പാടുമുള്ള ആവശ്യക്കാർക്ക് ഭക്ഷണം നൽകുന്നത് തുടരുന്നുവെന്ന് ഉറപ്പാക്കുന്നതിനായി സുസ്ഥിരമായ റിയൽ എസ്റ്റേറ്റ് എൻഡോവ്മെന്റുകളും സ്ഥാപിച്ചിട്ടുണ്ട്.