മുഴുവന്‍ ജീവനക്കാര്‍ക്കും 1.12 ലക്ഷം രൂപ പാന്‍ഡമിക് ബോണസ് നല്‍കി മൈക്രോസോഫ്റ്റ്

ന്യൂഡല്‍ഹി | മൈക്രോസോഫ്റ്റ് എല്ലാ ജീവനക്കാര്‍ക്കും 1.12 ലക്ഷം രൂപ ബോണസ് നല്‍കി. പാന്‍ഡമിക് ബോണസ് എന്നാണ് സമ്പത്തിക സഹായത്തിന് മൈക്രോസോഫ്റ്റ് പേരിട്ടിരിക്കുന്നത്. കഴിഞ്ഞ സാമ്പത്തിക വര്‍ഷത്തില്‍ മോശം സാഹചര്യത്തിലും ജോലി ചെയ്ത തൊഴിലാളികള്‍ക്കുള്ള അംഗീകാരമാണ് ഈ ബോണസ്.

മൈക്രോസോഫ്റ്റ് ചീഫ് പീപ്പിള്‍ ഓഫീസര്‍ കത്തലിന്‍ ഹോഗനാണ് ഈ ബോണസ് പ്രഖ്യാപിച്ചത്. അമേരിക്കയിലും അന്താരാഷ്ട്രതലത്തിലുമുള്ള എല്ലാ ജീവനക്കാര്‍ക്കും ഈ ആനുകൂല്യം നല്‍കും. ലോകത്താകെ മൈക്രോസോഫ്റ്റിന് 175508 ജീവനക്കാര്‍ ഉണ്ടെന്നാണ് കണക്ക്.

ദ വെര്‍ജ് പുറത്തുവിട്ട വാര്‍ത്ത പ്രകാരം 2021 മാര്‍ച്ച് 31 ന് മുന്‍പ് കമ്പനിയില്‍ പ്രവേശിച്ച എല്ലാ കോര്‍പ്പറേറ്റ് വൈസ് പ്രസിഡന്റുമാര്‍ക്ക് താഴെയുള്ള ജീവനക്കാര്‍ക്കും മൈക്രോസോഫ്റ്റ് ഈ ബോണസ് അനുവദിച്ചിട്ടുണ്ടെന്നാണ് റിപ്പോര്‍ട്ട്. താല്‍ക്കാലിക, പാര്‍ട്ട് ടൈം ജീവനക്കാര്‍ക്കും ഈ ആനുകൂല്യം നല്‍കുമെന്നാണ് റിപ്പോര്‍ട്ടിലുള്ളത്. ഏകദേശം 200 ദശലക്ഷം അമേരിക്കന്‍ ഡോളറാണ് പാന്‍ഡമിക്ക് ബോണസിന് വേണ്ടി മൈക്രോസോഫ്റ്റ് ചിലവഴിക്കുന്നത്.