നാല് മണ്ഡലങ്ങളിലെ സിപിഐ സ്ഥാനാര്‍ഥികളെ ഇന്ന് പ്രഖ്യാപിച്ചേക്കും

തിരുവനന്തപുരം | നാല് നിയമസഭാ മണ്ഡലങ്ങളിലെ സിപിഐ സ്ഥാനാര്‍ഥികളെ സംസ്ഥാന നേതൃത്വം ഇന്ന് പ്രഖ്യാപിച്ചേക്കും. മണ്ഡലം കമ്മിറ്റികളുടെ എതിര്‍പ്പ് നിലനില്‍ക്കുന്നുണ്ടെങ്കിലും ചടയമംഗലത്ത് സിപിഐ ദേശീയ കൗണ്‍സില്‍ അംഗം ചിഞ്ചുറാണിയും ഹരിപ്പാട് എഐഎസ്എഫ് സംസ്ഥാന ഭാരവാഹി സജിലാലും തന്നെ സ്ഥാനാര്‍ഥികളാകുമെന്നാണ് സൂചന.

പറവൂര്‍ മണ്ഡലത്തിലെ സ്ഥാനാര്‍ഥിത്വം സംബന്ധിച്ചും തീരുമാനമാകേണ്ടതുണ്ട്. നാട്ടിക മണ്ഡലത്തില്‍ ഗീതാ ഗോപിക്ക് വീണ്ടും അവസരം നല്‍കണോ എന്ന കാര്യത്തിലും സിപിഐ സംസ്ഥാനസെന്റര്‍ ഇന്ന് തീരുമാനമെടുക്കും. ആദ്യ ഘട്ടത്തില്‍ 21 മണ്ഡലങ്ങളിലെ സ്ഥാനാര്‍ത്ഥികളെയാണ് സിപിഐ പ്രഖ്യാപിച്ചത്.

ചടയമംഗലത്ത് ചിഞ്ചുറാണിയെ സ്ഥാനാര്‍ഥിയാക്കുന്നതിനെതിരെ വന്‍ പ്രതിഷേധമാണ് നടന്നത്. എന്നാല്‍ വനിതാ പ്രാതിനിധ്യം എന്ന നിലപാട് ഉയര്‍ത്തി നേതാക്കള്‍ പ്രാദേശിക നേതൃത്വത്തിന്റെ ആവശ്യം തള്ളുകയായിരുന്നു.