Ongoing News
നടി ആക്രമിക്കപ്പെട്ട കേസ്: നിലവിലെ കോടതിയില്നിന്നും ഇരക്ക് നീതി ലഭ്യമാകില്ല;കോടതി മാറ്റം ആവശ്യപ്പെട്ട് പ്രോസിക്യൂഷന്
കൊച്ചി | നടിയെ ആക്രമിച്ച കേസില് വിചാരണക്കോടതി മാറ്റണമെന്ന ആവശ്യവുമായി പ്രോസിക്യൂഷന്. ഇക്കാര്യം ആവശ്യപ്പെട്ട് പ്രോസിക്യൂഷന് ഹരജി ഫയല് ചെയ്തു. കോടതിയില്നിന്ന് സുതാര്യമായ വിചാരണ പ്രതീക്ഷിക്കുന്നില്ലെന്നും കോടതി മാറ്റണമെന്നുമാണ് പ്രോസിക്യൂഷന്റെ ആവശ്യം.
അസാധാരണമായ നടപടിയാണ് കേസില് ഉണ്ടായിരിക്കുന്നത്. വിചാരണ മാറ്റണമെന്നാവശ്യപ്പെട്ട് പ്രത്യേക കോടതിയില് പ്രോസിക്യൂഷന് ഹരജി ഫയല് ചെയ്തിട്ടുണ്ട്. ഹൈക്കോടതിയില് ട്രാന്സ്ഫര് പെറ്റീഷന് നല്കുമെന്നും അതുവരെ വിചാരണ നടപടികള് നിര്ത്തിവെക്കണമെന്നുമാണ് ഹര്ജിയിലെ ആവശ്യം.
182ാമത്തെ സാക്ഷിയെ കഴിഞ്ഞ ദിവസം വിസ്തരിച്ചിരുന്നു. ഈ ഘട്ടത്തില് പ്രോസിക്യൂഷന് എതിരെയുള്ള ഒരു കത്ത് കോടതി വായിച്ചു. മാത്രമല്ല, പ്രോസിക്യൂഷനെതിരെ ഒട്ടും അടിസ്ഥാനമില്ലാത്തതും വസ്തുതാവിരുദ്ധവുമായ ആരോപണങ്ങള് കോടതി ഉന്നയിച്ചെന്നും പ്രോസിക്യൂഷന് പറയുന്നു. ഈ സാഹചര്യത്തില് സുതാര്യമായ വിചാരണ കോടതിയില് നടക്കുമെന്ന് കരുതുന്നില്ല. ഇരക്ക് നീതി ലഭ്യമാകും എന്ന് പ്രതീക്ഷിക്കാന് കഴിയില്ലെന്നും ഹരജിയില് ചൂണ്ടിക്കാട്ടുന്നു.ഹരജി ഇന്നുതന്നെ കോടതി പരിഗണിച്ചേക്കുമെന്നാണ് സൂചന.