സ്വര്‍ണക്കടത്ത് കേസ്: മകന്‍ ബിജെപി പ്രവര്‍ത്തകനെന്ന് സന്ദീപിന്റെ അമ്മ

തിരുവനന്തപുരം | സ്വര്‍ണക്കടത്തു കേസിലെ മുഖ്യപ്രതി സ്വപ്‌ന സുരേഷിന്റെ അടുത്ത സുഹൃത്തും കേസിലെ പ്രധാന കണ്ണിയുമായ സന്ദീപ് നായര്‍ ബിജെപി പ്രവര്‍ത്തകനാണെന്ന് അമ്മ. മകന്‍ ബി ജെ പി പ്രവര്‍ത്തകനാണെന്നും അവരുടെ തിരഞ്ഞെടുപ്പ് പ്രചാരണങ്ങളില്‍ പോയിരുന്നുവെന്നും സന്ദീപിന്റെ അമ്മ വ്യക്തമാക്കി.

താന്‍ പറയാത്ത കാര്യങ്ങള്‍ എന്റെ പേരില്‍ കൊടുക്കുന്ന മാധ്യമങ്ങള്‍ അത് തിരുത്താന്‍ തയ്യാറാവണമെന്നും സന്ദീപിന്റെ അമ്മ പറഞ്ഞു. അല്ലാത്തപക്ഷം നിയമനടപടി ആലോചിക്കുമെന്നും അവര്‍ വ്യക്തമാക്കി.

തിരുവനന്തപുരം നഗരത്തിലെ ഒരു തടിക്കടയിലെ ജീവനക്കാരനായിരുന്നു ആദ്യം സന്ദീപ്. പിന്നീട് പല ആളുകളുടെയും ഡ്രൈവറായി ജോലി ചെയ്തു. തിരുവനന്തപുരം നഗരത്തിലെ ഒരു ബി ജെ പി കൗണ്‍സിലറുടെ ഡ്രൈവറായും ജോലി ചെയ്തിരുന്നു.

ഇതിനിടെ സന്ദീപ് സി പി എം പ്രവര്‍ത്തകനാണെന്ന പ്രചാരണത്തിനെതിരെ സി പി എം ജില്ലാസെക്രട്ടറി ആനാവൂര്‍ നാഗപ്പന്‍ രംഗത്തെത്തിയിട്ടുണ്ട്. ബി ജെ പി മണ്ഡലം പ്രസിഡന്റും കൗണ്‍സിലറുമായ എസ് കെ പി രമേശിന്റെ ജീവനക്കാരനാണ്‌സന്ദീപ്. ബി ജെ പി പ്രവര്‍ത്തകനായ സന്ദീപിനെ സി പി എം പ്രവര്‍ത്തകനെന്ന രീതിയില്‍ ചിത്രീകരിക്കാനുള്ള ശ്രമം അപലപനീയമാണെന്നും അദ്ദേഹം പറഞ്ഞു.