ചൈനയിൽ നിന്നെത്തിയ വിദ്യാർത്ഥികൾക്ക് കൊറോണ വൈറസ് ബാധയില്ലെന്ന് സഊദി ആരോഗ്യ മന്ത്രാലയം

റിയാദ് | കൊറോണ വൈറസ് ഭീതി വിതക്കുന്ന ചൈനീസ് നഗരമായ വുഹാനില്‍ നിന്നും പ്രത്യേക വിമാനത്തില്‍ സഊദിയിലെത്തിച്ച പത്ത് വിദ്യാര്‍ത്ഥിള്‍ക്കും വൈറസ് ബാധയില്ലെന്ന് സഊദി ആരോഗ്യ മന്ത്രാലയം സ്ഥിരീകരിച്ചു. ഇവരുടെ രണ്ടാമത്തെ പരിശോധാനാ ഫലവും നെഗറ്റീവാണ്. സുരക്ഷാ മുന്‍കരുതലിന്റെ ഭാഗമായി രണ്ടാഴ്ചയായി മെഡിക്കല്‍ വിഭാഗത്തിന്റെ പ്രത്യേക നിരീക്ഷണത്തിലായിരുന്നു വിദ്യാര്‍ഥികള്‍ കഴിഞ്ഞിരുന്നത്.

വിദ്യാര്‍ത്ഥികളുടെ ആരോഗ്യവും – സുരക്ഷയും പരിശോധിച്ച് ആവശ്യമായ മുഴുവന്‍ നടപടിക്രമങ്ങളും സ്വീകരിച്ച ശേഷമാണ് വീടുകളിലേക്ക് പോകാന്‍ അനുവദിച്ചതെന്ന് മന്ത്രാലയ വൃത്തങ്ങള്‍ വ്യക്തമാക്കി.

സഊദി ഭരണാധികാരിയും തിരുഗേഹങ്ങളുടെ സൂക്ഷിപ്പുകാരനുമായ സല്‍മാന്‍ രാജാവിന്റെയും കിരീടാവകാശി മുഹമ്മദ് ബിന്‍ സല്‍മാന്റെയും നിര്‍ദ്ദേശ പ്രകാരമാണ് പ്രത്യേക വിമാനത്തില്‍ വിദ്യാര്‍ഥികളെ സഊദിയിലെത്തിച്ചത്.