മൊബൈല്‍ ഫോണ്‍ വാങ്ങിയതിന് ഭര്‍ത്താവ് വെട്ടി പരിക്കേല്‍പ്പിച്ച യുവതി മരിച്ചു

തൃശൂര്‍ | മൊബൈല്‍ ഫോണ്‍ വാങ്ങിയതിന് ഭര്‍ത്താവ് വെട്ടി പരിക്കേല്‍പ്പിച്ച യുവതി മരിച്ചു. മാള അഷ്ടമിച്ചിറയില്‍ മക്കളുടെ കണ്‍മുന്നിലിട്ട് ഭര്‍ത്താവ് വെട്ടിപ്പരുക്കേല്‍പിച്ച വി വി ശ്രീഷ്മ മോള്‍(39) ആണ് മരിച്ചത്. കൊലപാതകത്തിന് പിന്നാലെ ഭര്‍ത്താവ് വാസനെ പോലീസ് അറസ്റ്റ് ചെയ്തു.

സ്വകാര്യ സൂപ്പര്‍ മാര്‍ക്കറ്റില്‍ പാക്കിങ് ജോലിക്കാരിയായ ശ്രീഷ്മ അടുത്തിടെ വായ്പയെടുത്ത് സ്മാര്‍ട് ഫോണ്‍ വാങ്ങിയിരുന്നു. സ്മാര്‍ട് ഫോണ്‍ വാങ്ങിയതിനെത്തുടര്‍ന്ന് ഇരുവരും തമ്മില്‍ തര്‍ക്കം ഉണ്ടായി. ഭാര്യയില്‍ സംശയമുണ്ടായതിനെത്തുടര്‍ന്ന് പ്രതി വഴക്കിടുകയും വെട്ടിപ്പരിക്കേല്‍പ്പിക്കുകയും ചെയ്തുവെന്ന് പോലീസ് പറഞ്ഞു.

കഴിഞ്ഞ മാസം 29ന് രാത്രിയായിരുന്നു ആക്രമണം. ഗുരുതര പരുക്കുകളോടെ കൊച്ചിയിലെ സ്വകാര്യ ആശുപത്രിയില്‍ ചികിത്സയിലായിരുന്നു ശ്രീഷ്മ. വാസനും ശ്രീഷ്മക്കും നാല് മക്കളാണുള്ളത്. ഭര്‍ത്താവ് വാസന്‍ സ്ഥിരമായി ജോലിക്ക് പോകുന്ന സ്വഭാവക്കാരനല്ല. മക്കളുടെ മുന്നിലിട്ടായിരുന്നു ക്രൂര കൃത്യം. കൈകാലുകള്‍ വെട്ടുകത്തികൊണ്ട് വെട്ടിപ്പരിക്കേല്‍പ്പിച്ചിരുന്നു.

മാളയിലെ ആശുപത്രിയില്‍ നിന്നു നില വഷളായപ്പോഴാണ് കൊച്ചിയിലെ സ്വകാര്യ ആശുപത്രിയിലേയ്ക്ക് മാറ്റിയെങ്കിലും ഇന്ന് മരണം സംഭവിക്കുകയായിരുന്നു.