Health
എന്താണ് കാര്‍പ്പല്‍ ടണല്‍ സിന്‍ഡ്രം
സ്ത്രീകളിലും പുരുഷന്മാരിലും ഒരുപോലെ കാണുന്ന അസുഖമാണ് കാര്‍പ്പല്‍ ടണല്‍ സിന്‍ഡ്രം.
ഏറ്റവുമധികം ആളുകള്‍ നേരിടുന്ന ആരോഗ്യപ്രശ്‌നമാണ് കൈകള്‍ക്കുണ്ടാകുന്ന തരിപ്പ്, മരവിപ്പ്, അസഹ്യമായ വേദന എന്നിവയെല്ലാം. ഈ അസുഖം കാര്‍പ്പല്‍ ടണല്‍ സിന്‍ഡ്രം എന്നാണ് അറിയപ്പെടുന്നത്. ഈ അസുഖത്തിന്റെ ഏറ്റവും വലിയ ബുദ്ധിമുട്ട് കൈയ്ക്കുണ്ടാകുന്ന തരിപ്പാണ്. വീട്ടിലെ ജോലികള്‍ ചെയ്യുമ്പോള്‍, ഫോണ്‍ ചെയ്യുമ്പോള്‍, കൂടുതല്‍ സമയം എന്തെങ്കിലും വസ്തുക്കള്‍ കൈയില്‍ പിടിച്ചിരിക്കുമ്പോഴെല്ലാം കൈക്ക് തരിപ്പും വേദനയും ഉണ്ടാകുന്നു. ഉറക്കത്തില്‍ കൈക്ക് തരിപ്പ് ഉണ്ടായി ഉറക്കം ശരിയാകാത്ത അവസ്ഥയും രോഗികള്‍ക്കുണ്ടാകുന്നു. ഇത് സ്ത്രീകളിലും പുരുഷന്മാരിലും ഒരുപോലെ കാണുന്ന അസുഖമാണ്. പലപ്പോഴും പ്രമേഹം, അമിതവണ്ണം, തൈറോയ്ഡ്, വാതസംബന്ധമായ അസുഖങ്ങള്‍ എന്നിവയുള്ളവരില്‍ ഈ അസുഖം കൂടുതലായി കണ്ടുവരാറുണ്ട്. മാത്രമല്ല, ഗര്‍ഭിണികളില്‍ വളരെയധികം ഈ അസുഖം ഉണ്ടാകാറുണ്ട്. ഇത് അവര്‍ക്ക് താല്‍ക്കാലികമായി മാത്രമേ ഉണ്ടാകുകയുള്ളൂ.
കാര്‍പ്പല്‍ ടണല്‍ സിന്‍ഡ്രം
നമ്മുടെ കൈയില്‍നിന്ന് കൈപ്പത്തിയിലേക്ക് പോകുന്ന ഒരു ഞരമ്പുണ്ട്, മീഡിയന്‍ നെര്‍വ് എന്നാണിതിനെ പറയുക. ഈ ഞരമ്പ് മണികണ്ഠത്തിലൂടെ ചെറിയൊരു ‘ടണല്‍’ പോലുള്ള സ്ഥലത്തുകൂടിയാണ് കൈപ്പത്തിയിലേക്ക് പ്രവേശിക്കുന്നത്. തുടര്‍ച്ചയായി മണികണ്ഠത്തില്‍ ആഘാതമേല്‍പിക്കുന്ന ജോലികള്‍, ഇതിലൂടെ കടന്നുപോകുന്ന തന്തുക്കള്‍ ഉള്‍പ്പെടെയുള്ള ഭാഗങ്ങളില്‍ നീര്‍വീഴ്ച ഉണ്ടാക്കുകയും ആ ഭാഗത്ത് വീക്കം ഉണ്ടാവുകയും ചെയ്യുന്നു. ഇങ്ങനെയുള്ള വീക്കം ടണലിന്റെ ഉള്‍വിസ്താരം കുറയ്ക്കുകയും മീഡിയന്‍ നെര്‍വിനെ ഞെരുക്കുകയും ചെയ്യുന്നു. ഇത് മരവിപ്പായി രോഗിയ്ക്ക് അനുഭവപ്പെടുന്നു.
മീഡിയന്‍ നെര്‍വ് ചെന്നെത്തുന്നത് തള്ളവിരല്‍, ചൂണ്ടുവിരല്‍, നടുവിരല്‍, മോതിരവിരലിന്റെ പകുതിഭാഗം എന്നിവയിലേക്കാണ്. തുടര്‍ച്ചയായി കീബോര്‍ഡ് ഉപയോഗം, മ്യൂസിക്കല്‍ ഇന്‍സ്ട്രുമെന്റ്, ടൈപ്പ്റൈറ്റിങ്, തയ്യല്‍, പാക്കിങ് ജോലി, ക്ലീനിങ് എന്നീ ജോലികള്‍ ചെയ്യുന്നവരില്‍ ഇത് ഉണ്ടാവാന്‍ സാധ്യതയുണ്ട്. തുടര്‍ച്ചയായി മണികണ്ഠത്തെ ചലിപ്പിക്കുന്ന ജോലികള്‍ ചെയ്യുന്നവരില്‍ സാധ്യത കൂടുതലാണ്. ജന്മനാതന്നെ ടണലിന്റെ വിസ്താരം കുറഞ്ഞവരിലും ഇത് ഉണ്ടായേക്കാം. ചിലതരം മുഴകള്‍, ഒടിവ്, ചതവ് ഇവയും ഈ അസുഖത്തിന് കാരണമാകാറുണ്ട്.
എങ്ങനെ മസിലാക്കാം
ക്ലിനിക്കല്‍ എക്‌സാമിനേഷനിലൂടെ കണ്ടെത്താന്‍ സാധിക്കും. നെര്‍വ് കണ്ടക്ഷന്‍ സ്റ്റഡിയിലൂടെയും കാര്‍പ്പല്‍ ടണല്‍ സിന്‍ഡ്രം കണ്ടെത്താവുന്നതാണ്. കൈയ്ക്ക് വരുന്ന എല്ലാ തരിപ്പുകളും കാര്‍പ്പല്‍ ടണല്‍ സിന്‍ഡ്രമായി കണക്കാക്കരുത്. കൃത്യമായി രോഗം ഇതാണെന്ന് ഉറപ്പുവരുത്തേണ്ടത് അത്യാവശ്യമാണ്.
ചികിത്സ
തുടക്കത്തിലേ ഈ രോഗം കണ്ടെത്തിയവര്‍ക്ക് മരുന്നുകള്‍, സ്റ്റിറോയ്ഡ് ഇഞ്ചക്ഷന്‍ എന്നിവയാണ് കൊടുക്കുക. ചില രോഗികള്‍ക്ക് ഈ ചികിത്സകൊണ്ടുതന്നെ മാറ്റമുണ്ടാകും. രോഗത്തിന്റെ തീവ്രത കൂടിയവര്‍ക്ക് ചെറിയ സര്‍ജറി ചെയ്യേണ്ടി വരും. സര്‍ജറി കഴിഞ്ഞ് ഒരു മണിക്കൂറിനുള്ളില്‍ തന്നെ അസുഖം പൂര്‍ണ്ണമായും മാറുന്നതായിരിക്കും.
രോഗം വരാന്‍ സാധ്യതയുള്ള ജോലിയില്‍ ഏര്‍പ്പെടുന്നവര്‍ തുടര്‍ച്ചയായി ജോലി ചെയ്യാതെ ഇടയ്ക്കിടക്ക് കൈയ്ക്ക് വിശ്രമം കൊടുക്കുന്നത് നല്ലതാണ്. ആ സമയങ്ങളില്‍ കൈപ്പത്തി നിവര്‍ത്തിയും ചുരുക്കിയും ചെറിയ ചെറിയ വ്യായാമം കൊടുത്തും ഒരുപരിധിവരെ കാര്‍പ്പല്‍ ടണല്‍ സിന്‍ഡ്രത്തെ മറികടക്കാം. തുടര്‍ച്ചയായി കീബോര്‍ഡ് ഉപയോഗിക്കുന്നവര്‍ റിസ്റ്റ്റെസ്റ്റ് എര്‍ഗൊണോമിക്ക് ഗ്ലൗ, മൗസ്പാഡ് ഇവ ഉപയോഗിക്കുന്നത് നല്ലതാണ്. കൈപ്പത്തിക്കും കുഴയ്ക്കും പ്രാധാന്യം കൊടുത്തുകൊണ്ടുള്ള ചെറുവ്യായാമങ്ങള്‍ ശീലമാക്കുകയും വേണം.
വിവരങ്ങള്‍ക്ക് കടപ്പാട്: ഡോ. ആരിഫ് പി.കെ
കണ്‍സള്‍ട്ടന്റ് ഓര്‍ത്തോപീഡിക്‌സ്
ആസ്റ്റര്‍ മിംസ്, കോട്ടക്കല്‍
Latest
ബാറില്‍ ഭീകരാന്തരീക്ഷം സൃഷ്ടിച്ച പ്രതികളെ കസ്റ്റഡിയില്‍ എടുക്കാനെത്തിയ പോലീസിനു നേരെ ആക്രണം; യുവാക്കള്‍ അറസ്റ്റില്‍
പാലക്കാട് ജില്ലയില്‍ ഉഷ്ണതരംഗ മുന്നറിയിപ്പ് നല്‍കി കേന്ദ്ര കാലാവസ്ഥ വകുപ്പ്
പ്രധാനമന്ത്രിയുടെ വിദ്വേഷ പ്രസംഗത്തെ വിമര്‍ശിച്ച ബി.ജെ.പി ന്യൂനപക്ഷമോര്‍ച്ച നേതാവിനെ പുറത്താക്കി
ഉള്ള്യേരിയില്‍ ബോംബ് കണ്ടെത്തിയെന്ന വാര്‍ത്ത;പരിശോധിച്ചപ്പോള്‍ പ്രോട്ടീന്‍ പൗഡര്‍ ടിന്‍
ഡല്‍ഹി ലഫ്റ്റനന്റ് ഗവര്‍ണറുടെ കേരള സന്ദര്‍ശനം; അടിയന്തര നടപടി ആവശ്യപ്പെട്ട് തിരഞ്ഞെടുപ്പ് കമീഷന് പ്രതിപക്ഷ നേതാവിന്റെ പരാതി
വടകരയില്‍ കലാശക്കൊട്ടിനിടെ സ്ഥാനാര്‍ഥിക്കെതിരെ അധിക്ഷേപ മുദ്രാവാക്യം ; എല്‍ഡിഎഫ് പരാതി നല്‍കി
