വഖഫ് ഭേദഗതി നിയമം; ഹരജികള്‍ സുപ്രീം കോടതി ഇന്ന് വീണ്ടും പരിഗണിക്കും

ന്യൂഡല്‍ഹി |  വഖഫ് (ഭേദഗതി) നിയമത്തിന്റെ ഭരണഘടനാ സാധുതയെ ചോദ്യം ചെയ്യുന്ന ഹരജികള്‍ സുപ്രീം കോടതി ഇന്ന് വീണ്ടും പരിഗണിക്കും. വഖഫ് നിയമം ചോദ്യം ചെയ്ത് വിവിധ കക്ഷികള്‍ സമര്‍പ്പിച്ച ഹരജിയില്‍ പ്രസ്തുത നിയമത്തിലെ രണ്ട് വ്യവസ്ഥകള്‍ താത്കാലികമായി തടഞ്ഞ് നടപടിക്ക് പിന്നാലെ മൂന്നാഴ്ചകള്‍ക്ക് ശേഷമാണ് വിഷയം വീണ്ടും കോടതി പരിഗണിക്കുന്നത്.

2025 ലെ വഖഫ് ഭേദഗതി നിയമത്തിലെ വ്യവസ്ഥകള്‍ മതപരമായ സ്വാതന്ത്ര്യം ഉറപ്പുനല്‍കുന്ന ആര്‍ട്ടിക്കിള്‍ 26 ലംഘിക്കുന്നെന്ന് ചൂണ്ടിക്കാട്ടി സമര്‍പ്പിക്കപ്പെട്ട ഹരജികളാണ് കോടതിയുടെ പരിഗണനയിലുള്ളത്. വിഷയത്തില്‍ കേന്ദ്ര സര്‍ക്കാരിന്റെ നിലപാട് അറിയിക്കാനായിരുന്നു കോടതി സമയം അനുവദിച്ചത്.

കഴിഞ്ഞ പതിനൊന്ന് വര്‍ഷത്തിനിടയില്‍ 116 ശതമാനം വര്‍ദ്ധനവ് വഖഫ് ഭൂമിയുടെ കാര്യത്തില്‍ ഉണ്ടായിയെന്നാണ് സുപ്രീം കോടതി ആരോപണം. ഹിന്ദു മതസ്ഥാപനങ്ങളുടെയും സിഖ് മതസ്ഥാപനങ്ങളുടെയും ഭരണത്തിനായി രൂപവത്കരിച്ച നിയമങ്ങളില്‍ നിന്ന് വ്യത്യസ്തമായി വഖഫ് ബോര്‍ഡുകളെ ലക്ഷ്യം വെയ്ക്കുന്നതാണ് പുതിയ വഖഫ് ഭേദഗതി നിയമെന്നാണ് ഹരജികളില്‍ പറയുന്നത്.