Kerala
ചൂട് കൂടുന്നു; സംസ്ഥാനത്ത് ഒന്പത് ജില്ലകളില് യെല്ലോ അലര്ട്ട്
ഉയര്ന്ന ചൂട് സൂര്യാഘാതം, നിര്ജലീകരണം തുടങ്ങിയ ഗുരുതരമായ ആരോഗ്യ പ്രശ്നങ്ങള്ക്ക് കാരണമാകും
തിരുവനന്തപുരം | സംസ്ഥാനത്ത് 9 ജില്ലകളില് താപനില സാധാരണയേക്കാള് രണ്ട് മുതല് നാല് ഡിഗ്രി സെല്ഷ്യസ് വരെ ഉയരാന് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. കൊല്ലം, ആലപ്പുഴ ,പാലക്കാട് ,തിരുവനന്തപുരം ,കോട്ടയം ,എറണാകുളം ,തൃശൂര് ,കോഴിക്കോട് ,കണ്ണൂര് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്.
കൊല്ലം, ആലപ്പുഴ, പാലക്കാട് ജില്ലകളില് പരമാവധി 37 ഡിഗ്രിയും തിരുവനന്തപുരം, കോട്ടയം, എറണാകുളം, തൃശൂര്, കോഴിക്കോട്, കണ്ണൂര് ജില്ലകളില് 36 ഡിഗ്രിയും ചൂട് അനുഭവപ്പെടും. പൊതുജനങ്ങള് ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി അറിയിച്ചു.
ഉയര്ന്ന ചൂട് സൂര്യാഘാതം, നിര്ജലീകരണം തുടങ്ങിയ ഗുരുതരമായ ആരോഗ്യ പ്രശ്നങ്ങള്ക്ക് കാരണമാകും. ചൂട് അധികരിക്കുന്ന സാഹചര്യത്തില് കാട്ടുതീ പടരാന് സാധ്യതയുള്ളതിനാല് വന മേഖലയോട് ചേര്ന്ന് താമസിക്കുന്നവരും വിനോദസഞ്ചാരികളും ജാഗ്രത പാലിക്കണം.