സ്വപ്ന സുരേഷ് മുൻകൂർ ജാമ്യാപേക്ഷ നൽകി

തിരുവനന്തപുരം | സ്വര്‍ണക്കടത്ത് കേസ് പ്രതി സ്വപ്‌ന സുരേഷ് മുൻകൂർ ജാമ്യാപേക്ഷ നൽകി.  പുതിയ വെളിപ്പെടുത്തലിന് പിന്നിലെ ഗൂഢാലോചന സംബന്ധിച്ച് അന്വേഷണം നടത്തണമെന്ന് ആവശ്യപ്പെട്ട് കെ ടി ജലീല്‍ എം എല്‍ എ നല്‍കിയ പരാതിയിൽ കേസെടുത്തതിനെ തുടർന്നാണ് ഈ നീക്കം. ഹൈക്കോടതിയിലാണ് സ്വപ്ന മുൻകൂർ ജാമ്യാപേക്ഷ നൽകിയത്. തിരുവനന്തപുരത്തെ കന്റോണ്‍മെന്റ് പോലീസ് സ്വപ്നക്കെതിരെ കേസെടുത്തത്. ജനപക്ഷം നേതാവ് പി സി ജോർജും പ്രതിയാണ്.

കേസിൽ അറസ്റ്റുണ്ടാകുമെന്ന് ഭയന്നാണ് മുൻകൂർ ജാമ്യം നൽകിയത്. ഗൂഢാലോചന, കലാപശ്രമം അടക്കമുള്ള വകുപ്പുകൾ ചേർത്താണ് കേസെടുത്തത്. സർക്കാർ തന്നെ വേട്ടയാടുകയാണെന്ന് സ്വപ്ന ആരോപിച്ചു. സ്വപ്‌ന തെറ്റായ ആരോപണം ഉന്നയിച്ചതിനതിരേയും ഇതിന് പിന്നില്‍ പി സി ജോര്‍ജ് അടക്കമുള്ളവര്‍ നടത്തിയ ഗൂഢാലോചനയും അന്വേഷിക്കണമെന്ന് ജലീലിലിൻ്റെ പരാതിയിൽ ആവശ്യപ്പെട്ടിരുന്നു.

സ്വര്‍ണക്കടത്ത് കേസിലെ പ്രതി മുഖ്യമന്ത്രിക്കും കുടുംബത്തിനും വ്യകതിപരമായി തനിക്കും എതിരെ ഉന്നയിച്ച കള്ള ആരോപണത്തിലാണ് പരാതി നല്‍കിയതെന്ന് ജലീല്‍ മാധ്യമങ്ങളോട് പ്രതികരിച്ചു. നുണപ്രചാരണത്തിലൂടെ ഇടത് സര്‍ക്കാറിനെ അസ്ഥിരപ്പെടുത്താന്‍ ശ്രമിക്കുന്നു. വലിയ ഒരു ഗൂഢാലോചന നടന്നിട്ടുണ്ട്. ഇത് ആരാണെന്ന് മാധ്യമങ്ങളില്‍ തന്നെ വ്യക്തമാക്കിയിട്ടുണ്ട്. ഇവരെ കണ്ടെത്താനാണ് പരാതിയെന്നും ജലീൽ പറഞ്ഞിരുന്നു.