കഴിഞ്ഞ പത്ത് വര്‍ഷം പോലെയല്ല; മുഖ്യമന്ത്രിയിൽ നിന്ന് ലഭിക്കുന്നത് നല്ല പിന്തുണ: കേന്ദ്ര സഹമന്ത്രി സുരേഷ് ഗോപി

തൃശൂർ | കേരള സർക്കാരിൽ നിന്ന് നേരത്തെ ഇല്ലാത്തവിധമുള്ള സഹകരണവും പിന്തുണയുമാണ് ഇപ്പോൾ (Kerala Government Support) ലഭിക്കുന്നതെന്ന് കേന്ദ്ര പെട്രോളിയം സഹമന്ത്രി സുരേഷ് ഗോപി. കഴിഞ്ഞ പത്ത് വർഷം സംസ്ഥാന സർക്കാരിൽ നിന്ന് യാതൊരു പിന്തുണയും തനിക്ക് ലഭിച്ചിരുന്നില്ല. എന്നാൽ ഇപ്പോഴത്തെ മുഖ്യമന്ത്രിയെ ഏത് കാര്യത്തിലും സമീപിക്കാമെന്നും അദ്ദേഹം പറഞ്ഞു. തൃശൂരിൽ മാധ്യമപ്രവർത്തകരോട് സംസാരിക്കുകയായിരുന്നു കേന്ദ്രസഹമന്ത്രി (Union Minister Suresh Gopi).

പുതിയ ഭരണം വന്നതിന് ശേഷം രക്ഷപ്പെട്ട ആളാണ് താൻ. മുഖ്യമന്ത്രിയോട് എന്ത് ആവശ്യപ്പെട്ടാലും അതിന് പിന്തുണയുണ്ട്. ജനങ്ങളുടെ ആവശ്യങ്ങൾ പരിഹരിക്കാൻ ഒരു എം പിക്ക് അല്ലെങ്കിൽ എം എൽ എയ്ക്ക് 10 വർഷമായി കിട്ടാത്ത പിന്തുണ ലഭിക്കുന്നുണ്ട്. തന്റെ മൂന്ന് പ്രോജക്ടുകളിലൊന്ന് മുഖ്യമന്ത്രിയുടെ പിന്തുണയുള്ളത് കൊണ്ട് ലഭിച്ചു. ഇനി രണ്ടെണ്ണം കൂടി തനിക്ക് ലഭിക്കാനുണ്ട്. അതും വൈകാതെ നടപ്പിലാക്കാൻ സാധിക്കുമെന്നാണ് പ്രതീക്ഷിക്കുന്നത്. ഇത്തരം പ്രോജക്ടുകൾ നടപ്പിലായാൽ ഇതിന്റെ ഗുണങ്ങളെത്തുന്നത് സാധാരണ ജനങ്ങളിലേക്കാണ്. സർക്കാരിൽ നിന്നും ലഭിക്കുന്ന ഇത്തരം പിന്തുണ കേന്ദ്ര പദ്ധതികൾ (Central Government Schemes) സംസ്ഥാനത്തേക്ക് എത്തിക്കുന്ന കാര്യം എളുപ്പമാക്കുമെന്നും സുരേഷ് ഗോപി കൂട്ടിച്ചേർത്തു.

റിപ്പോർട്ടർ ചാനൽ വിവാദവുമായി ബന്ധപ്പെട്ട ചോദ്യത്തിന് അന്വേഷണത്തിന്റെ ഭാഗമായി പോലീസ് എവിടെയും കയറുമെന്നായിരുന്നു സുരേഷ് ഗോപിയുടെ മറുപടി. മാധ്യമപ്രവർത്തകരും സാധാരണ പൗരന്മാരാണ്. സാധാരണക്കാരന്റെ വീടുകളിൽ റെയ്ഡ് നടത്തിയപ്പോൾ മുറ്റത്തല്ലല്ലോ പോലീസ് നിന്നത്. വീടിന്റെ തട്ട് വരെ പൊളിച്ചു നോക്കും പോലീസ് (Police Raid Controversy). സാധാരണക്കാരന്റെ വീട്ടിലേക്ക് പോലീസ് കയറുമ്പോൾ ആരും പ്രതികരിക്കാറില്ല. അവിടങ്ങളിലെല്ലാം ഫോൺ വാങ്ങിവെച്ച് തന്നെയാണ് പോലീസ് പരിശോധന നടത്താറുള്ളതെന്നും മന്ത്രി പറഞ്ഞു.