പേ വിഷബാധ: മുറിവ് പറ്റിയ ഭാഗം 15 മിനുട്ട് സോപ്പ് ഉപയോഗിച്ച് നന്നായി കഴുകണം; നിര്‍ദേശവുമായി ആരോഗ്യ വകുപ്പ്

പത്തനംതിട്ട | പേവിഷബാധ മൂലമുള്ള മരണം ഒഴിവാക്കാന്‍ പ്രത്യേകം ശ്രദ്ധിക്കണമെന്ന് പത്തനംതിട്ട ജില്ലാ ആരോഗ്യ ഓഫീസര്‍ ഡോ. എല്‍ അനിതകുമാരി. തെരുവുമൃഗങ്ങളോ വീടുകളില്‍ വളര്‍ത്തുന്ന നായ, പൂച്ച എന്നിവ കടിക്കുകയോ മാന്തുകയോ ചെയ്താല്‍ മുറിവ് പറ്റിയഭാഗം 15 മിനുട്ട് ടാപ്പ് തുറന്ന വെള്ളത്തിലോ കോരി ഒഴിച്ചോ സോപ്പ് ഉപയോഗിച്ച് നന്നായി കഴുകണം. ഇതിലൂടെ 99 ശതമാനം അണുക്കളും ഇല്ലാതാകും.

മുറിവ് കെട്ടിവെക്കരുത്. എത്രയും വേഗം അടുത്തുള്ള ആശുപത്രിയിലെത്തി പേവിഷബാധക്ക് എതിരായ കുത്തിവെപ്പ് ആരംഭിക്കണം. ഗുരുതരമായവ വാക്‌സിന് പുറമേ ഇമ്മ്യൂണോഗ്ലോബുലിന്‍ കുത്തിവെപ്പും എടുക്കണം. വളര്‍ത്തുമൃഗങ്ങള്‍ക്ക് വാക്‌സീനേഷന്‍ നല്‍കണം. പ്രതിരോധകുത്തിവെപ്പ് എടുത്ത വളര്‍ത്തുമൃഗങ്ങളില്‍ നിന്ന് കടിയേറ്റാലും വാക്‌സീന്‍ നിര്‍ബന്ധമായും എടുക്കണം.

കടിയേറ്റ ദിവസം തുടര്‍ന്ന് മൂന്ന്, ഏഴ്, 28 ദിവസങ്ങളില്‍ നാല് ഡോസ് ഐ ഡി ആര്‍വിയാണ് എടുക്കേണ്ടത്. ഒന്നോ രണ്ടോ വാക്‌സീന്‍ എടുത്ത് അവസാനിപ്പിക്കരുത്. മുഴുവന്‍ ഡോസും കൃത്യമായി പൂര്‍ത്തിയാക്കണം. മുഖത്തും കൈകളിലും കടിയേല്‍ക്കുന്നത് പെട്ടെന്ന് പേവിഷബാധയേല്‍ക്കാന്‍ കാരണമാകുന്നതിനാല്‍ പെട്ടെന്ന് പരമാവധി സമയം സോപ്പ് ഉപയോഗിച്ച് കഴുകണമെന്നും ആശുപത്രിയിലെത്തി ചികിത്സ തേടണം.

സ്ഥിരമായി മൃഗങ്ങളില്‍ നിന്ന് കടിയേല്‍ക്കാന്‍ സാധ്യതയുള്ള തൊഴിലില്‍ ഏര്‍പ്പെട്ടിരിക്കുന്നവര്‍ മുന്‍കൂട്ടി പ്രതിരോധകുത്തിവെപ്പ് എടുക്കണം. കുട്ടികളുടെ കാര്യത്തില്‍ പ്രത്യേക ശ്രദ്ധ വേണം. കളിക്കിടയില്‍ മൃഗങ്ങളുടെ മാന്തലോ കടിയോ ഏറ്റാല്‍ ആ വിവരം മാതാപിതാക്കളെ അറിയിക്കണം. ഇവ ബോധ്യപ്പെടുത്താന്‍ മാതാപിതാക്കള്‍ ശ്രദ്ധിക്കണം. സംസ്ഥാനത്തെ എല്ലാ ജില്ലാ ആശുപത്രികള്‍, ജനറല്‍ ആശുപത്രികള്‍, കമ്മ്യൂനിറ്റി ഹെല്‍ത്ത് സെന്ററുകള്‍, കുടുംബാരോഗ്യകേന്ദ്രങ്ങള്‍ എന്നിവിടങ്ങളില്‍ പേവിഷബാധക്ക് എതിരായ പ്രതിരോധവാക്‌സീന്‍ ലഭ്യമാണെന്നും ഡോ. എല്‍ അനിതകുമാരി പറഞ്ഞു.