ഖത്തർ ഗ്യാസ് ഉത്പാദനം നിർത്തി; ഇന്ത്യയിൽ പാചക വാതക വില ഉയരുമോ?

ന്യൂഡൽഹി | പശ്ചിമേഷ്യൻ യുദ്ധവും ഖത്തറിൽ നിന്നുള്ള എൽ എൻ ജി (LNG) വിതരണം നിലച്ചതും ഇന്ത്യയിലെ പാചകവാതക (LPG), പ്രകൃതിവാതക വിപണികളിൽ വലിയ പ്രത്യാഘാതങ്ങൾ ഉണ്ടാക്കിയേക്കാമെന്ന് വിദഗ്ധർ. ഖത്തറിലെ ഊർജ്ജനിലയങ്ങൾക്ക് നേരെ ഇറാൻ നടത്തിയ ആക്രമണത്തെത്തുടർന്ന് ഖത്തർ എനർജി എൽ എൻ ജി (LNG) ഉൽപ്പാദനം നിർത്തിയതോടെ യൂറോപ്പിലെ ഗ്യാസ് വിലയിൽ 50 ശതമാനത്തോളം വർധനവുണ്ടായി. ഇത് ഖത്തറിനെ ആശ്രയിക്കുന്ന മറ്റു രാജ്യങ്ങളേയും ബാധിച്ചേക്കാമെന്നാണ് റിപ്പോർട്ടുകൾ.

ഇന്ത്യക്കാവശ്യമായ എൽ പി ജിയുടെ 80-85 ശതമാനവും ഖത്തർ ഉൾപ്പെടെയുള്ള ഗൾഫ് രാജ്യങ്ങളിൽ നിന്നാണ് വരുന്നത്. ഇതിൽ ഭൂരിഭാഗവും ഹോർമുസ് കടലിടുക്ക് (Strait of Hormuz) വഴിയാണ് ഇന്ത്യയിലെത്തുന്നത്. ഖത്തറിൽ നിന്ന് മാത്രം 40-45 ശതമാനം എൽപിജി ഇന്ത്യ വാങ്ങുന്നുണ്ട്. ഖത്തർ ഉൽപ്പാദനം നിർത്തിവെച്ചതും ഈ പാതയിലെ സുരക്ഷാ ഭീഷണിയും ഇന്ത്യയിലേക്കുള്ള എൽ പി ജി വരവിനെ സാരമായി ബാധിക്കാനിയടയുണ്ട്.

ആഗോള വിപണിയിൽ എൽ എൻ ജി വില ഉയർന്നത് ഇന്ത്യയിലെ ഇറക്കുമതി ചെലവ് വർധിപ്പിക്കും. അന്താരാഷ്ട്ര വിപണിയിൽ ക്രൂഡ് ഓയിൽ വില ബാരലിന് 80 ഡോളറിന് മുകളിലേക്ക് ഉയർന്നതും എൽ പി ജി വിലയെ സ്വാധീനിക്കും. എങ്കിലും, സാധാരണക്കാരായ ഉപഭോക്താക്കളെ ബാധിക്കാത്ത തരത്തിൽ പെട്രോൾ, ഡീസൽ, പാചകവാതക വിലകൾ പെട്ടെന്ന് വർധിപ്പിക്കാതെ സർക്കാർ നിയന്ത്രിക്കാനാണ് സാധ്യത. എണ്ണക്കമ്പനികൾ ഈ നഷ്ടം താൽക്കാലികമായി സഹിക്കേണ്ടി വരും.

ക്രൂഡ് ഓയിലിന് ഇന്ത്യക്ക് തന്ത്രപ്രധാനമായ കരുതൽ ശേഖരം (Strategic Reserves) ഉണ്ടെങ്കിലും, എൽ പി ജിക്ക് അത്തരത്തിൽ വലിയ ശേഖരമില്ല. അതിനാൽ വിതരണത്തിൽ തടസ്സമുണ്ടായാൽ അത് വിപണിയിൽ പെട്ടെന്ന് പ്രതിഫലിച്ചേക്കാം. നിലവിൽ രാജ്യത്ത് 10 ദിവസത്തേക്കുള്ള ക്രൂഡ് ഓയിൽ ശേഖരവും ഒരാഴ്ചത്തേക്കുള്ള ഇന്ധന ശേഖരവും ഉണ്ടെന്നാണ് കണക്കാക്കുന്നത്.
പ്രകൃതിവാതകത്തെ (Natural Gas) ആശ്രയിച്ച് പ്രവർത്തിക്കുന്ന വളം നിർമ്മാണ ശാലകൾ, ഊർജ്ജ നിലയങ്ങൾ, സിറ്റി ഗ്യാസ് വിതരണം (CNG, PNG) എന്നിവയ്ക്ക് ആഗോള വിലവർധനവ് തിരിച്ചടിയാകും. ഇറക്കുമതി ചെയ്യുന്ന ഗ്യാസിന്റെ വില കൂടുന്നത് ഈ മേഖലകളിലെ ഉൽപ്പാദന ചെലവ് വർധിപ്പിക്കാൻ കാരണമാകും.

ചുരുക്കത്തിൽ, ഖത്തറിലെ പ്രതിസന്ധി നീണ്ടുപോയാൽ ഇന്ത്യയിൽ പാചകവാതക വിതരണത്തിൽ സമ്മർദ്ദമുണ്ടാകാനും സബ്‌സിഡി ഇല്ലാത്ത സിലിണ്ടറുകളുടെ വില വർധിക്കാനും സാധ്യതയുണ്ട്.

Summary

The ongoing conflict in West Asia and the suspension of LNG production in Qatar could severely impact India’s LPG and natural gas markets, as India relies on Gulf nations for nearly 85% of its LPG imports. While global gas prices have surged by 50% and crude oil has crossed $80 per barrel, the Indian government may initially absorb costs to shield consumers, though industries like fertilizers and power generation face immediate production cost hikes. With limited strategic reserves for LPG and potential blockades in the Strait of Hormuz, a prolonged crisis could lead to supply shortages and price increases for non-subsidized cylinders across the country.