സിക്കന്തർ ബാദുഷ ദർഗയിൽ മുസ്‍ലിംകൾക്ക് റമസാൻ, ബക്രീദ് ദിനങ്ങളിൽ മാത്രം പ്രാർഥനാനുമതി; വിധി ശരിവെച്ച് സുപ്രീം കോടതി

മധുര | തമിഴ്‌നാട്ടിലെ മധുര തിരുപ്പരൻകുണ്ടം മലനിരകളിലെ നെല്ലിത്തോപ്പ് പ്രദേശത്തുള്ള സിക്കന്ദർ ബാദുഷ ഔലിയ ദർഗയിലെ മതപരമായ ചടങ്ങുകൾക്ക് നിയന്ത്രണമേർപ്പെടുത്തിയ മദ്രാസ് ഹൈക്കോടതി വിധി സുപ്രീം കോടതി ശരിവെച്ചു. റമസാൻ, ബക്രീദ് ദിനങ്ങളിൽ മാത്രമായി പ്രാർത്ഥനകൾ പരിമിതപ്പെടുത്തിയ ഹൈക്കോടതി ഉത്തരവിൽ ഇടപെടാൻ സുപ്രീം കോടതി വിസമ്മതിച്ചു. ദർഗയിൽ ദിവസേനയുള്ള പ്രാർത്ഥനകൾക്ക് അനുമതി നൽകണമെന്ന ആവശ്യം കോടതി നിരാകരിച്ചു.

33 സെന്റ് ഭൂമി ദർഗയുടെ ഉടമസ്ഥതയിലാണെന്ന് ഹൈക്കോടതി അംഗീകരിച്ചിരുന്നെങ്കിലും പ്രാർത്ഥനകൾക്ക് നിയന്ത്രണം ഏർപ്പെടുത്തിയിരുന്നു. ഇതിനെതിരെ എം ഇമാം ഹുസൈൻ എന്നയാൾ സമർപ്പിച്ച അപ്പീൽ ജസ്റ്റിസുമാരായ അരവിന്ദ് കുമാർ, പി ബി വരാലെ എന്നിവരടങ്ങിയ ബെഞ്ച് തള്ളി. ഹൈക്കോടതിയുടെ തീരുമാനം സമതുലിതമാണെന്നും ഇതിൽ ഇടപെടേണ്ട സാഹചര്യമില്ലെന്നും ബെഞ്ച് നിരീക്ഷിച്ചു. ദർഗ പരിസരത്ത് മൃഗബലി നടത്തുന്നതും മാംസാഹാരം പാകം ചെയ്യുന്നതും ഹൈക്കോടതി നിരോധിച്ചിരുന്നു. ഈ ഉത്തരവും സുപ്രീം കോടതി ശരിവെച്ചിട്ടുണ്ട്.

എം ഇമാം ഹുസൈന് വേണ്ടി ഹാജരായ മുതിർന്ന അഭിഭാഷകൻ പ്രശാന്ത് ഭൂഷൺ, മുൻകാലങ്ങളിൽ ഇവിടെ ക്രമസമാധാന പ്രശ്നങ്ങളൊന്നും ഉണ്ടായിട്ടില്ലെന്ന് വാദിച്ചു. ഭൂമിയുടെ ഉടമസ്ഥാവകാശം ദർഗയ്ക്കാണെന്ന് കോടതി അംഗീകരിച്ചിട്ടും പ്രാർത്ഥനയ്ക്ക് നിയന്ത്രണം ഏർപ്പെടുത്തുന്നത് ശരിയല്ലെന്ന് അദ്ദേഹം ചൂണ്ടിക്കാട്ടി.

എന്നാൽ, ക്രമസമാധാന പ്രശ്നങ്ങൾ ഇല്ലായിരുന്നെങ്കിൽ എന്തിനാണ് സമാധാന സമിതി യോഗം വിളിച്ചതെന്ന് കോടതി ചോദിച്ചു. കഴിഞ്ഞ ജനുവരി 30-ന് റവന്യൂ ഡിവിഷണൽ ഓഫീസർ യോഗം വിളിച്ചത് ചൂണ്ടിക്കാട്ടിയായിരുന്നു കോടതിയുടെ ചോദ്യം.

സിക്കന്ദർ ബാദുഷ ദർഗയിലെ സുപ്രധാനമായ സന്തനക്കൂട് ഉറൂസിൽ പങ്കെടുക്കുന്നവരുടെ എണ്ണം 50 ആയി പരിമിതപ്പെടുത്താനും മദ്രാസ് ഹൈക്കോടതിയുടെ മധുര ബെഞ്ച് നേരത്തെ നിർദ്ദേശിച്ചിരുന്നു. ജനുവരി 6-ന് നടന്ന ഉറൂസിന് മുൻകാല അനുമതികളുടെ അടിസ്ഥാനത്തിൽ മാത്രമാണ് ഉദ്യോഗസ്ഥർ അനുമതി നൽകിയത്. കന്തൂരി മഹോത്സവത്തിന് നിലവിൽ അനുമതിയില്ലെന്നും അധികൃതർ വ്യക്തമാക്കിയിട്ടുണ്ട്.