ഗതാഗത മാർഗങ്ങൾ

ഇന്ത്യയുടെ വ്യാവസായിക വളർച്ചക്ക് സഹായമാകുന്നത് വിവിധ ഗതാഗത മാർഗങ്ങളാണ്. ഇത് രാജ്യത്തിന്റെ ജീവനാഡികളായാണ് വിശേഷിപ്പിക്കപ്പെടുന്നത്. വ്യാവസായിക വളർച്ചയെ കൂടാതെ നഗര വികസനത്തിലും വിവിധ ഗതാഗതമാർഗങ്ങൾ വഹിച്ച പങ്ക് നിർണായകമാണ്. ഗ്രാമപ്രദേശങ്ങളെയും നഗര പ്രദേശങ്ങളെയും തമ്മിൽ ബന്ധിപ്പിക്കുന്നതിനും നഗരവത്കരണം ത്വരിതപ്പെടുത്തുന്നതിനും ഗതാഗതമാർഗങ്ങൾ സഹായകമായി. നമ്മുടെ വിവിധ ഗതാഗത മാർഗങ്ങൾ പരിശോധിക്കാം.

റോഡ്

ഇന്ത്യയിലെ വൈവിധ്യമാർന്ന ഭൂപ്രകൃതിക്കനുസരിച്ച് റോഡുകൾ നിർമിക്കാൻ കഴിഞ്ഞത് രാജ്യ പുരോഗതിയെ ഏറെ സഹായിച്ചിട്ടുണ്ട്. ഇന്ത്യയിലെ എല്ലാ ഭൂപ്രദേശങ്ങളെയും റോഡ് ഗതാഗതം മുഖേന ബന്ധിപ്പിക്കാൻ കഴിഞ്ഞിട്ടുണ്ട്. ലോകത്തിലെ ഏറ്റവും വിപുലമായ റോഡ് ശ്യംഖലയുള്ള രാജ്യങ്ങളിലൊന്നാണ് ഇന്ത്യ. റോഡുകളുടെ നിർമാണത്തിലും വികസനത്തിലും ഭൂപ്രകൃതിയുടെ സ്വാധീനം നിർണായകമാണ്. മഹാസമതലം, തീരസമതലം, ഡെക്കാൻ പീഠഭൂമി പ്രദേശം എന്നിവിടങ്ങളിലാണ് റോഡ് ശ്യംഖല കൂടുതലായി കാണപ്പെടുന്നത്. എന്നാൽ ഹിമാലയ പ്രദേശത്തും വടക്ക് കിഴക്കൻ സംസ്ഥാനങ്ങളിലും റോഡ് ശൃംഖല കുറവാണ്.

റോഡുകൾ സവിശേഷതകൾ
ദേശീയപാതകൾ

സംസ്ഥാന തലസ്ഥാനങ്ങൾ, വാണിജ്യ നഗരങ്ങൾ എന്നിവയെ തമ്മിൽ ബന്ധിപ്പിക്കുന്നു. നിർമാണവും പുനരുദ്ധാരണവും നടത്തുന്നത് കേന്ദ്ര സർക്കാറാണ്. രാജ്യത്തെ പ്രധാന റോഡ് ശൃംഖലയാണിത്.

സംസ്ഥാന പാതകൾ

സംസ്ഥാനത്തിന്റെ പ്രധാന റോഡ് ശൃംഖലയായ ഇത് വിവിധ ഭാഗങ്ങളെ തമ്മിൽ ബന്ധിപ്പിക്കുന്നു. നിർമാണവും പുനരുദ്ധാരണവും നടത്തുന്നത് സംസ്ഥാന സർക്കാറാണ്.

ജില്ലാ റോഡുകൾ

ജില്ലയിലെ വിവിധ ഭാഗങ്ങളെ തമ്മിൽ ബന്ധിപ്പിക്കുന്നു. ജില്ല/ബ്ലോക്ക് പഞ്ചായത്തുകളാണ് നിർമാണവും പുനരുദ്ധാരണവും നടത്തുന്നത്.

ഗ്രാമീണ റോഡുകൾ

ടാർ ചെയ്തതും ടാർ ചെയ്യാത്തതുമായ റോഡുകൾ ഉൾപ്പെടുന്നു. ഗ്രാമപഞ്ചായത്തുകളാണ് നിർമാണവും പുനരുദ്ധാരണവും നടത്തുന്നത്.

സുവർണ ചതുഷ്‌കോണം

ഇന്ത്യയിലെ നാല് മഹാനഗരങ്ങളെ തമ്മിൽ ബന്ധിപ്പിക്കുന്ന അതിവേഗ പാതയാണ് (express highway) സുവർണ ചതുഷ്‌കോണം എന്നറിയപ്പെടുന്നത്. 5846 കി മീ ദൈർഘ്യമുള്ള ഈ പാത മഹാനഗരങ്ങൾ തമ്മിലുള്ള ഗതാഗതസമയം ഗണ്യമായി കുറയ്ക്കുന്നതിന് സഹായകമാണ്. ഈ അതിവേഗപാതയെ കൂടാതെ ശ്രീനഗർ (ജമ്മുകശ്മീർ) മുതൽ കന്യാകുമാരി (തമിഴ്‌നാട്) വരെയുള്ള 4076 കി മീ ദൈർഘ്യമുള്ള വടക്കു- തെക്ക് ഇടനാഴിയും സിൽച്ചാർ (അസം) മുതൽ പോർബന്തർ (ഗുജറാത്ത്) വരെയുള്ള 3640 കി മീ ദൈർഘ്യമുള്ള കിഴക്കു- പടിഞ്ഞാറ് ഇടനാഴിയും അതിവേഗപാത എന്ന വിഭാഗത്തിൽ കേന്ദ്ര സർക്കാർ വിഭാവനം ചെയ്തിട്ടുണ്ട്.

റെയിൽ ഗതാഗതം

ഏഷ്യയിലെ ഏറ്റവും വലിയ റെയിൽ ശൃംഖലയുള്ള രാജ്യമാണ് ഇന്ത്യ. ദീർഘദൂര യാത്രക്കും വൻതോതിലുള്ള ചരക്കുനീക്കത്തിനും സൗകര്യപ്രദമായ ഗതാഗത മാർഗമാണിത്. ഉത്തരസമതല പ്രദേശം, ഗുജറാത്ത്, തമിഴ്‌നാട് എന്നിവിടങ്ങളിലാണ് റെയിൽ ശ്യംഖല ഏറ്റവും കൂടുതലുള്ളത്. ഇന്ത്യയുടെ വടക്കു- കിഴക്കൻ സംസ്ഥാനങ്ങളിൽ റെയിൽ ഗതാഗതം വളരെ കുറവാണ്.

കൊങ്കൺ റെയിൽവേ

1988 ജനുവരി 26നാണ് കൊങ്കൺ റെയിൽപാതയിലൂടെ ഗതാഗതം ആരംഭിച്ചത്. സ്വാതന്ത്ര്യലബ്ധിക്ക് ശേഷം ഇന്ത്യൻ റെയിൽവേ ഏറ്റെടുത്ത കടുത്ത വെല്ലുവിളിയായിരുന്നു ഈ ദൗത്യം. ഈ റെയിൽപാത 146ഓളം നദികളും പുഴകളും മുറിച്ചുകടക്കുന്നു. 2,000 പാലങ്ങളും 91 തുരങ്കങ്ങളും ഈ പാതയിലുണ്ട്. ഇതിലെ ഏറ്റവും വലിയ തുരങ്കത്തിന് 6.5 കിലോമീറ്റർ ദൈർഘ്യമുണ്ട്. ഇത് ഏഷ്യയിലെ തന്നെ ഏറ്റവും വലിയ തുരങ്കമാണ്. മഹാരാഷ്ട്രയിലെ റോഹ മുതൽ കർണാടകത്തിലെ മംഗലാപുരം വരെ 760 കി മീ ദൈർഘ്യമുള്ള ഈ റെയിൽപാതയുടെ നിർമാണത്തിന് 3,500 കോടി രൂപ വേണ്ടിവന്നു. കൊങ്കൺ റെയിൽ കോർപറേഷനാണ് ഈ പാതയുടെ നിർമാണം നിർവഹിച്ചത്.

ജലഗതാഗതം

റോഡ്- റെയിൽ ഗതാഗതങ്ങളെ അപേക്ഷിച്ച് ജലപാതകളുടെ നിർമാണ- പുനരുദ്ധാരണ പ്രവർത്തനങ്ങൾക്കുള്ള ചെലവ് താരതമ്യേന കുറവാണ്. കൂടാതെ വായുമലിനീകരണം, ശബ്ദമലിനീകരണം എന്നിവയും കുറവാണ്. വൻതോതിലുള്ള ചരക്ക് നീക്കത്തിന് ഈ മാർഗമാണ് കൂടുതലായും ഉപയോഗിക്കുന്നത്. നദികൾ, കായലുകൾ, കനാലുകൾ എന്നിവയും 6,400 ഓളം കിലോമീറ്റർ ദൈർഘ്യമുള്ള സമുദ്രതീരവും ഇന്ത്യയിലെ ജലഗതാഗത സാധ്യത വർധിപ്പിക്കുന്നു.

ജലഗതാഗത മാർഗങ്ങളെ ഉൾനാടൻ ജലഗതാഗതമെന്നും സമുദ്രജല ഗതാഗതമെന്നും തരംതിരിച്ചിരിക്കുന്നു. കായൽ, നദി തുടങ്ങിയ ജലാശയങ്ങളിലൂടെയുള്ള ഗതാഗതത്തെയാണ് ഉൾനാടൻ ജലഗതാഗതമെന്ന് അറിയപ്പെടുന്നത്. ഗംഗ-ബ്രഹ്മപുത്ര നദികളും അവയുടെ പോഷകനദികളും ഗോദാവരി, കൃഷ്ണ നദികൾ, അവയുടെ കനാലുകൾ, ആന്ധ്ര-തമിഴ്‌നാട് എന്നിവിടങ്ങളിലെ ബക്കിംഗ് ഹാം കനാൽ, ഗോവയിലെ മണ്ഡാവി, സുവാരി നദികൾ, കേരളത്തിലെ കായലുകൾ എന്നിവിടങ്ങളിലാണ് ഇന്ത്യയിലെ ഉൾനാടൻ ജലഗതാഗതം പ്രധാനമായും കേന്ദ്രീകരിച്ചിരിക്കുന്നത്. ദേശീയ ജലപാതാ അതോറിറ്റി പ്രധാന ഉൾനാടൻ ജലപാതകളെ ദേശീയ ജലപാതകളായി പ്രഖ്യാപിച്ചിട്ടുണ്ട്.

ഇന്ത്യക്ക് നീണ്ട തീരപ്രദേശമാണുള്ളത്. പടിഞ്ഞാറും കിഴക്കുമുള്ള തീരപ്രദേശങ്ങളിൽ സമുദ്രജല ഗതാഗതത്തിന് അനന്ത സാധ്യതകളുണ്ട്. ഈ തീരപ്രദേശത്ത് 12 പ്രധാന തുറമുഖങ്ങളും 185 ഓളം ചെറിയ തുറമുഖങ്ങളും സ്ഥിതി ചെയ്യുന്നു. അന്താരാഷ്ട്ര വാണിജ്യ ഭൂപടത്തിൽ സ്ഥാനം പിടിച്ചിട്ടുള്ള ഈ തുറമുഖങ്ങൾ ഇന്ത്യയുടെ സമ്പദ്ഘടനയിൽ നിർണായക സ്വാധീനം ചെലുത്തുന്നുണ്ട്.

ഇന്ത്യയിലെ പ്രധാന തുറമുഖങ്ങൾ

കണ്ട്‌ല – ഗുജറാത്ത്
മുംബൈ – മഹാരാഷ്ട്ര
ജവഹർലാൽ നെഹ്റു – മഹാരാഷ്ട്ര
മർമഗോവ – ഗോവ
മംഗലാപുരം – കർണാടക
കൊച്ചി – കേരളം
തൂത്തുക്കുടി – തമിഴ്‌നാട്
ചെന്നൈ – തമിഴ്‌നാട്
എന്നൂർ – ആന്ധ്രപ്രദേശ്
പാരദ്വീപ് – ഒഡിഷ
ഹാൽഡിയ – പശ്ചിമ ബംഗാൾ
കൊൽക്കത്ത- പശ്ചിമ ബംഗാൾ

വ്യോമഗതാഗതം

ഏറ്റവും വേഗതയേറിയതും ചെലവേറിയതുമായ ഗതാഗത മാർഗമാണ് വ്യോമഗതാഗതം. ദുർഘടമായ രൂപാകൃതിയുള്ള പ്രദേശങ്ങളിലോ, റോഡ് റെയിൽ ഗതാഗതമാർഗങ്ങൾ തടസ്സപ്പെട്ട പ്രദേശങ്ങളിലോ എത്തിപ്പെടാൻ ആശ്രയിക്കാവുന്ന ഏക ഗതാഗതമാർഗമാണിത്. ആദ്യ കാലങ്ങളിൽ എയർ ഇന്ത്യ, ഇന്ത്യൻ എയർലൈൻസ് എന്നീ പൊതുമേഖലാ എയർ ലൈനുകളുടെ നിയന്ത്രണത്തിലായിരുന്നു വ്യോമ ഗതാഗതം. എന്നാൽ, ഇന്ന് ധാരാളം സ്വകാര്യ എയർലൈൻ കമ്പനികളും ഈ രംഗത്ത് പ്രവർത്തിക്കുന്നുണ്ട്.

സിയാൽ

ജനപങ്കാളിത്തത്തോടെ നിർമിച്ച ഇന്ത്യയിലെ ആദ്യത്തെ വിമാനത്താവളമാണ് കൊച്ചി അന്താരാഷ്ട്ര വിമാനത്താവളം. 1999 മെയ് 25നാണ് ഇത് പൊതുജനങ്ങൾക്കായി തുറന്നുകൊടുത്തത്. 30ലധികം രാജ്യങ്ങളിൽ നിന്നുള്ള വിദേശ ഇന്ത്യക്കാർ ഉൾപ്പെടെ 10,000 ൽ അധികം നിക്ഷേപകരാണ് ഈ വിമാനത്താവളം സാക്ഷാത്കരിക്കുന്നതിന് സഹായമേകിയത്.