ഭൂമി തട്ടിപ്പ് കേസ്‌: സിബിഐ ചോദ്യം ചെയ്യലിന്‌ ലാലു പ്രസാദ്‌ യാദവ്‌ വീല്‍ചെയറിലെത്തി

ന്യൂഡല്‍ഹി| ഭൂമി അഴിമതി കേസില്‍ ബിഹാര്‍ മുന്‍ മുഖ്യമന്ത്രി ലാലു പ്രസാദ്‌ യാദവും ഭാര്യ റാബ്റി ദേവിയും മകള്‍ മിസാ ഭാരതിയും ഇന്ന് സിബിഐ കോടതിയില്‍ എത്തി. മൂന്ന് മാസം മുമ്പ് സിംഗപ്പൂരില്‍ വൃക്ക മാറ്റിവെക്കല്‍ ശസ്ത്രക്രിയയ്ക്ക് ശേഷം ആദ്യമായി കോടതിയില്‍ ഹാജരായ ലാലു യാദവ് വീല്‍ചെയറിലാണ് എത്തിയത്.

മുന്‍ മുഖ്യമന്ത്രിമാരായ ലാലു യാദവ്, റാബ്റി ദേവി, ബിഹാര്‍ ഉപമുഖ്യമന്ത്രി തേജസ്വി യാദവ് ഉള്‍പ്പെടെയുള്ളയുളളവര്‍ക്കെതിരെ അഴിമതി കേസില്‍ അന്വേഷണം നടക്കുകയാണ്.

ചട്ടങ്ങള്‍ ലംഘിച്ച് റെയില്‍വേയില്‍ ക്രമവിരുദ്ധ നിയമനങ്ങള്‍ നടന്നതായി സിബിഐ കുറ്റപത്രത്തില്‍ ആരോപിച്ചു. ക്രിമിനല്‍ ഗൂഢാലോചന, വഞ്ചന, വ്യാജരേഖ ചമയ്ക്കല്‍, അഴിമതി തുടങ്ങിയ കുറ്റങ്ങളാണ് ലാലുവിനും കുടുംബാംഗങ്ങള്‍ക്കുമെതിരെ ചുമത്തിയിരിക്കുന്നത്. ലാലു  റെയില്‍വേ മന്ത്രിയായിരിക്കെ അദ്ദേഹത്തിന്റെ സഹായിയായിരുന്ന ഭോല യാദവിനെ കഴിഞ്ഞ വര്‍ഷം ജൂലൈയില്‍ സിബിഐ അറസ്റ്റ് ചെയ്തിരുന്നു.

ഡല്‍ഹി, പട്ന, മുംബൈ, റാഞ്ചി എന്നിവിടങ്ങളിലെ 24 സ്ഥലങ്ങളില്‍ നടത്തിയ പരിശോധനയില്‍ യാദവിന്റെ കുടുംബം സമ്പാദിച്ചതായി ആരോപിക്കുന്ന സ്വത്തുക്കള്‍ എന്‍ഫോഴ്സ്മെന്റ് ഡയറക്ടറേറ്റ് പട്ടികപ്പെടുത്തി. കണക്കില്‍ പെടാത്ത ഒരു കോടി രൂപ, 1,900 ഡോളറിന്റെ വിദേശ കറന്‍സി, 540 ഗ്രാം സ്വര്‍ണക്കട്ടി, 1.25 കോടി രൂപ വിലമതിക്കുന്ന 1.5 കിലോയിലധികം സ്വര്‍ണാഭരണങ്ങള്‍, യാദവിന്റെ കുടുംബാംഗങ്ങളുടെ പേരിലുള്ള സ്വത്ത് രേഖകള്‍ എന്നിവ കണ്ടെത്തിയതായി കേന്ദ്ര ഏജന്‍സി അറിയിച്ചു.

തേജസ്വി യാദവിന്റെ ഡല്‍ഹിയിലെ വീട്ടില്‍ ഈ ആഴ്ച ആദ്യം സിബിഐ പരിശോധന നടത്തിയിരുന്നു. ഇയാളുടെ സഹോദരി രാഗിണി യാദവിനും മറ്റുമുള്ള സ്വത്തുക്കളിലും ഇഡി പരിശോധന നടത്തി.

ആം ആദ്മി പാര്‍ട്ടി നേതാവ് മനീഷ് സിസോദിയയുടെ അറസ്റ്റിനെച്ചൊല്ലിയുള്ള രാഷ്ട്രീയ യുദ്ധത്തിനിടയില്‍, കേന്ദ്ര അന്വേഷണ ഏജന്‍സികളെ ദുരുപയോഗം ചെയ്യുന്നതായി ആരോപിച്ച് എട്ട് പ്രതിപക്ഷ പാര്‍ട്ടികള്‍ കഴിഞ്ഞ ആഴ്ച പ്രധാനമന്ത്രി നരേന്ദ്ര മോദിക്ക് കത്തെഴുതിയിരുന്നു.