ജുമൈറ ബീച്ച് 1 തുറന്നു; കൂടുതൽ മനോഹരമാക്കി കടൽതീരം

ദുബൈ |നവീകരണ പ്രവർത്തനങ്ങൾക്കായി താൽക്കാലികമായി അടച്ചിട്ടിരുന്ന ദുബൈയിലെ പ്രശസ്തമായ ജുമൈറ ബീച്ച് 1 സന്ദർശകർക്കായി വീണ്ടും തുറന്നു. ദുബൈയിലെ കടൽതീരങ്ങൾ ലോകനിലവാരത്തിലേക്ക് ഉയർത്തുന്നതിനും വിനോദസഞ്ചാരികൾക്കും താമസക്കാർക്കും മികച്ച സൗകര്യങ്ങൾ ഒരുക്കുന്നതിനുമായി നഗരസഭ നടപ്പിലാക്കുന്ന വലിയ വികസന പദ്ധതിയുടെ ഭാഗമായാണ് ബീച്ച് നവീകരിച്ചത്. ആധുനിക രീതിയിലുള്ള ഇരിപ്പിടങ്ങൾ, നടപ്പാതകൾ, സൈക്കിൾ ട്രാക്കുകൾ എന്നിവ പുതിയ രൂപകൽപ്പനയിൽ ഉൾപ്പെടുത്തിയിട്ടുണ്ട്. രാത്രിയിൽ കടലിൽ കുളിക്കുന്നതിനായുള്ള പ്രത്യേക വെളിച്ച സംവിധാനങ്ങളും സുരക്ഷാ ക്രമീകരണങ്ങളും ഇവിടെ സജ്ജീകരിച്ചിട്ടുണ്ട്.

തീരദേശ വികസനത്തിന്റെ ഭാഗമായി ജുമൈറ ബീച്ചിന്റെ സൗന്ദര്യം വർധിപ്പിക്കുന്നതിനൊപ്പം കുടുംബങ്ങൾക്കും കായിക പ്രേമികൾക്കും ആവശ്യമായ എല്ലാ സൗകര്യങ്ങളും ഇവിടെ ഒരുക്കിയിട്ടുണ്ട്. സുരക്ഷിതമായ കുളിക്കാനുള്ള സൗകര്യങ്ങൾ, പുതിയ കളിസ്ഥലങ്ങൾ, ശൗചാലയങ്ങൾ എന്നിവയും സന്ദർശകർക്കായി തുറന്നുനൽകി. വൈകല്യമുള്ളവർക്കായി പ്രത്യേക റാമ്പുകളും കടൽതീരത്തേക്ക് ഇറങ്ങാനുള്ള സൗകര്യങ്ങളും നവീകരണത്തിന്റെ ഭാഗമായി ഉൾപ്പെടുത്തിയിട്ടുണ്ട്.

പുതിയ കഫേകളും റെസ്റ്റോറന്റുകളും ഉടൻ തന്നെ ബീച്ചിൽ പ്രവർത്തനം ആരംഭിക്കും. സുരക്ഷാ മുൻകരുതലിന്റെ ഭാഗമായി കൂടുതൽ ലൈഫ് ഗാർഡുകളെ ഇവിടെ വിന്യസിച്ചിട്ടുണ്ട്. രാവിലെ മുതൽ രാത്രി വൈകുന്നത് വരെ ജനങ്ങൾക്ക് ഇവിടെ സമയം ചിലവഴിക്കാൻ സാധിക്കും. പരിസ്ഥിതി സൗഹൃദമായ നിർമാണ രീതികളാണ് നവീകരണത്തിനായി സ്വീകരിച്ചിട്ടുള്ളത്.
വരും ദിവസങ്ങളിൽ ജുമൈറയിലെ മറ്റ് ബീച്ചുകളിലും സമാനമായ വികസന പ്രവർത്തനങ്ങൾ പൂർത്തിയാക്കി ജനങ്ങൾക്കായി തുറന്നു കൊടുക്കുമെന്ന് അധികൃതർ വ്യക്തമാക്കി.