ജുനൈദ് കൈപ്പാണിയുടെ നേതൃത്വത്തിൽ ജനതാദൾ എസ് ആർ ജെ ഡിയിൽ ലയിച്ചു

കോഴിക്കോട് | ജനതാദൾ എസ് അഖിലേന്ത്യാ ജനറൽ സെക്രട്ടറി ജുനൈദ് കൈപ്പാണിയുടെ നേതൃത്വത്തിലുള്ള ജനതാദൾ എസ് വിഭാഗം രാഷ്ട്രീയ ജനതാദളിൽ ലയിച്ചു. ലയന സമ്മേളനം ആർ ജെ ഡി സംസ്ഥാന പ്രസിഡണ്ട് എം വി ശ്രേയാംസ്‌കുമാർ ജുനൈദ് കൈപ്പാണിക്ക് പതാക കൈമാറി ഉദ്ഘാടനം ചെയ്തു.

വർഗീയ ഫാഷിസത്തിനെതിരായി ചെറുതും വലുതുമായ മുഴുവൻ സോഷ്യലിസ്റ്റ് ജനാധിപത്യ ശക്തികളും ഏകീകരിക്കപ്പെടണമെന്നും രാജ്യത്തെ രക്ഷിക്കാനായുള്ള ദേശീയബദലിനായി നിലകൊള്ളുവാൻ ആർ ജെ ഡി പ്രതിജ്ഞബദ്ധമാണെന്നും എം വി ശ്രേയാംസ്‌കുമാർ പറഞ്ഞു. ഈ ദിശയിൽ സ്വാഗതാർഹമായ നീക്കമാണ് ജുനൈദ് കൈപ്പാണിയുടെ നേതൃത്വത്തിലുള്ള ജനതാദൾ കൈക്കൊണ്ടതെന്നും ശ്രേയാംസ് കുമാർ ചൂണ്ടിക്കാട്ടി.

ജനാധിപത്യ സോഷ്യലിസ്റ്റ് മൂല്യങ്ങൾ ഉയർത്തിപ്പിടിച്ച് സാധാരണക്കാരായ ആളുകളുടെ പ്രശ്നങ്ങൾ ഏറ്റെടുത്ത് മുന്നോട്ട് പോകുന്ന ലാലു പ്രസാദ് യാദവിന്റെ നേതൃത്വത്തിലുള്ള ആർജെഡിയെ ശക്തിപ്പെടുതേണ്ടത് കാലഘട്ടത്തിന്റെ ആവശ്യമാണെന്നും സോഷ്യലിസ്റ്റുകളുടെ പുനരേകീകരണം യാഥാർഥ്യമാക്കേണ്ട അനിവാര്യമായ രാഷ്ട്രീയ സാഹചര്യമാണ് നിലവിലുള്ളതെന്നും ജുനൈദ് കൈപ്പാണി പറഞ്ഞു.

ഇതൊരു ലയനമല്ല സോഷ്യലിസ്റ്റ് സഹയാത്രികരുടെ പുനസമാഗമമാണെന്നും ജുനൈദ് കൈപ്പാണി കൂട്ടിചേർത്തു.

കോഴിക്കോട് സൗഹൃദം സംഗീതവേദി ഹാളിൽ നടന്ന ചടങ്ങിൽ ആർ ജെ ഡി കോഴിക്കോട് ജില്ലാ പ്രസിഡന്റ്‌ എം. കെ ഭാസ്കരൻ മുഖ്യപ്രഭാഷണം നടത്തി. റോയി മനയ്ക്കപറമ്പിൽ, ബിജു സേവിസ്,മോയിൻ കുട്ടി,അഡ്വ. ജമാലുദ്ധീൻ പി.കെ,ശ്രീകല കെ.എസ്,ജാബിർ വി.കെ തുടങ്ങിയവർ പ്രസംഗിച്ചു.