കൊടുവള്ളിയില്‍ അജ്ഞാത സംഘം തട്ടിക്കൊണ്ടുപോയ അനൂസ് റോഷനെ ഇതുവരെ കണ്ടെത്താനായില്ല

കോഴിക്കോട് | കൊടുവള്ളിയില്‍ അജ്ഞാത സംഘം തട്ടിക്കൊണ്ടുപോയ അനൂസ് റോഷനെ ഇതുവരെ കണ്ടെത്താനായില്ല. ഇന്നലെയാണ് കൊടുവള്ളി കിഴക്കോത്ത് സ്വദേശി റഷീദിന്റെ മകന്‍ അനൂസ് റോഷനെ കാറിലെത്തിയ സംഘം തട്ടിക്കൊണ്ടു പോയത്.

തട്ടിക്കൊണ്ടുപോകല്‍ സംഭവത്തില്‍ അഞ്ചു ദിവസം മുമ്പ് തട്ടിക്കൊണ്ടുപോയ സംഘം സ്ഥലത്തെത്തിയിരുന്നതായുള്ള വിവരം പുറത്തുവന്നു. കാറിലെത്തിയ സംഘം പ്രദേശത്ത് കുറച്ച് സമയം ചെലവഴിക്കുന്നതും നാട്ടുകാരനുമായി സംസാരിക്കുന്നതിന്റെയും ദൃശ്യങ്ങള്‍ പുറത്തുവന്നു. കഴിഞ്ഞ തിങ്കളാഴ്ചയാണ് സംഘം കൊടുവള്ളി പരപ്പാറയില്‍ എത്തിയത്. സംഘം സംസാരിച്ച പ്രദേശവാസിയെ പോലീസ് ചോദ്യം ചെയ്തു.

ഇന്നലെ വൈകീട്ട് നാലു മണിയോടെ ആയുധങ്ങളുമായി കാറില്‍ എത്തിയ സംഘം വീട്ടില്‍ നിന്നുമാണ് യുവാവിനെ തട്ടിക്കൊണ്ടുപോയത്. ഇവരുടെ കയ്യില്‍ നിന്ന് ഒരു കത്തി വീട്ടുമുറ്റത്ത് വീണിട്ടുണ്ട്. സംഘം വന്നകാര്‍ കടന്നുകളയുന്നതിന്റെ ദൃശ്യം സമീപത്തെ അങ്ങാടിയിലെ സി സി ടി വിയില്‍ പതിഞ്ഞിട്ടുണ്ട്.