#FACTCHECK: കര്‍ണാടക അതിര്‍ത്തിയോട് ചേര്‍ന്ന പ്രദേശങ്ങളുടെ പേര് കേരളം മാറ്റുന്നുവോ?

കര്‍ണാടക അതിര്‍ത്തിയോട് ചേര്‍ന്ന കേരളത്തിലെ പ്രദേശങ്ങളുടെ പേര് മാറ്റാന്‍ പിണറായി സര്‍ക്കാര്‍ നീക്കം നടത്തുന്നുവെന്ന പ്രചാരണം ശക്തമാണ്. പ്രധാനമായും കര്‍ണാടകയിലാണ് പ്രചാരണമുള്ളത്. പല ദേശീയ മാധ്യമങ്ങളും ഇക്കാര്യം റിപ്പോര്‍ട്ട് ചെയ്തിട്ടുണ്ട്. കര്‍ണാടകയിലെ രാഷ്ട്രീയ നേതാക്കളും ഈ വിഷയം ഏറ്റുപിടിച്ച്, പേരുമാറ്റ നീക്കത്തില്‍ നിന്ന് പിന്മാറണമെന്ന് കേരള സര്‍ക്കാറിനോട് ആവശ്യപ്പെടുന്നുണ്ട്. കര്‍ണാടക മുഖ്യമന്ത്രി ബി എസ് യെദ്യൂരപ്പ ഇതുസംബന്ധമായി മുഖ്യമന്ത്രി പിണറായി വിജയന് കത്തയച്ചതായും വാര്‍ത്ത വന്നു. ഇതിന്റെ സത്യാവസ്ഥയറിയാം:

പ്രചാരണം: മഞ്ചേശ്വരം, കാസര്‍കോട് താലൂക്കുകളിലെ 11 വില്ലേജുകളുടെ കന്നഡയിലുള്ള പേര് മാറ്റി മലയാളത്തിലാക്കുന്നു. ഭാഷാ മൗലികവാദമാണിത്. അതിര്‍ത്തി പ്രദേശങ്ങളില്‍ താമസിക്കുന്ന കന്നഡിഗരും മലയാളികളും തമ്മില്‍ പ്രശ്‌നമുണ്ടാക്കാനാണ് ഇത് ഇടയാക്കുക. ഇക്കാര്യം പുനഃപരിശോധിക്കണമെന്ന് കേരളത്തോട് അഭ്യര്‍ഥിക്കുന്നു.

വസ്തുത: പ്രചരിക്കുന്നത് പോലെ വില്ലേജുകളുടെ പേരുമാറ്റം ആലോചിച്ചിട്ട് പോലുമില്ലെന്ന് മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തില്‍ അറിയിച്ചു. പ്രശ്‌നമുണ്ടാക്കാനുള്ള മനഃപൂര്‍വ ശ്രമമാണ് ഇത്. വിഷയം ചൂണ്ടിക്കാട്ടിയുള്ള കര്‍ണാടക മുഖ്യമന്ത്രിയുടെ കത്തും ലഭിച്ചിട്ടില്ല.