Kerala
വി ആര് പ്രേംകുമാറിനെ സര്വേ ഡയറക്ടര് സ്ഥാനത്തു നിന്ന് നീക്കി; വ്യവസായ വകുപ്പ് ഡയറക്ടറായി നിയമനം
തിരുവനന്തപുരം | സര്വേ ഡയറക്ടര് വി ആര് പ്രേംകുമാറിനെ തത്സ്ഥാനത്ത് നിന്നു മാറ്റി വ്യവസായ വകുപ്പ് ഡയറക്ടറായി സര്ക്കാര് നിയമിച്ചു. ഗിരിജ ഐ എ എസാണ് പുതിയ സര്വേ ഡയറക്ടര്. ബുധനാഴ്ചയാണ് ഇതുസംബന്ധിച്ച ഉത്തരവിറക്കിയത്. കഴിഞ്ഞ മന്ത്രിസഭാ യോഗമാണ് പ്രേംകുമാറിനെ മാറ്റാന് തീരുമാനിച്ചിരുന്നത്. സര്ക്കാര് നടപടിയില് റവന്യൂ പ്രിന്സിപ്പല് സെക്രട്ടറി ഡോ.വി. വേണു കടുത്ത അതൃപ്തി പ്രകടിപ്പിച്ചിരുന്നു. ഇതേത്തുടര്ന്നാണ് പെട്ടെന്ന് ഉത്തരവ് ഇറക്കാതെ മാറ്റിവച്ചിരുന്നത്. നടപടി പ്രാബല്യത്തില് വന്നതോടെ പ്രതിഷേധത്തിന്റെ ഭാഗമായി വേണു അവധിക്ക് അപേക്ഷിച്ചു.
സര്ക്കാര് നടപടിക്കെതിരേ ഐ എ എസ് ഓഫീസേഴ്സ് അസോസിയേഷനും പ്രമേയം പാസാക്കിയിരുന്നു. സിവില് സര്വീസ് ബോര്ഡിന്റെ മാര്ഗനിര്ദേശങ്ങളും നടപടിക്രമങ്ങളും പാലിച്ചാണ് ഐ എ എസ് ഉദ്യോഗസ്ഥനെ മാറ്റേണ്ടതെന്നാണ് ഐ എ എസ് ഓഫീസേഴ്സ് അസോസിയേഷന്റെ നിലപാട്.