ഗുസ്തി താരങ്ങളുടെ സമരത്തിനെതിരെ പി ടി ഉഷ; വിമർശം ശക്തം

ന്യൂഡൽഹി | ഗുസ്തി ഫെഡറേഷൻ അധ്യക്ഷൻ ബ്രിജ് ഭൂഷനെതിരെ പോലീസ് നടപടി ആവശ്യപ്പെട്ട് സമരം നടത്തുന്ന ഗുസ്തി താരങ്ങൾക്കെതിരെ രൂക്ഷവിമര്‍ശനവുമായി ഒളിന്പിക് അസ്സോസിയേഷന്‍ അധ്യക്ഷ പി ടി ഉഷ. തെരുവിലെ സമരം കായിക മേഖലക്കും രാജ്യത്തിന്റെ പ്രതിച്ഛായക്കും ദോഷം ചെയ്യും. സമരത്തിന് പോകും മുന്പ് താരങ്ങള്‍ ഒളിന്പിക് അസ്സോസിയേഷനെ സമീപിക്കണമായിരുന്നു- അവർ പറഞ്ഞു.

ഉഷയില്‍ നിന്ന് ഇത്ര പരുക്കന്‍ സമീപനം പ്രതീക്ഷിച്ചിരുന്നില്ലെന്നും പിന്തുണക്കേണ്ട ഐ ഒ എ അധ്യക്ഷയിൽ നിന്ന് ഇതല്ല പ്രതീക്ഷിച്ചതെന്നും താരങ്ങൾ പറഞ്ഞു.

ഗുസ്തി ഫെഡറഷന്‍ അധ്യക്ഷനും ബി ജെ പി. എം പിയുമായ ബ്രിജ് ഭൂഷണെതിരെ ഗുസ്തി താരങ്ങളുടെ പ്രതിഷേധം ഇപ്പോഴും തുടരുകയാണ്. ആരോപണങ്ങളില്‍ നടപടി എടുക്കാതെ സമരത്തില്‍ നിന്ന് പിന്മാറില്ലെന്ന് ഗുസ്തി താരങ്ങള്‍ വ്യക്തമാക്കി.