പ്രധാനമന്ത്രി നരേന്ദ്ര മോദി ഇസ്റാഈലിലേക്ക് തിരിച്ചു; നെതന്യാഹുവുമായി കൂടിക്കാഴ്ച നടത്തും

ന്യൂഡൽഹി / ടെൽ അവീവ് | പ്രധാനമന്ത്രി നരേന്ദ്ര മോദി രണ്ട് ദിവസത്തെ ഔദ്യോഗിക സന്ദർശനത്തിനായി ഇസ്റാഈലിലേക്ക് പുറപ്പെട്ടു. പ്രധാനമന്ത്രിയായ ശേഷമുള്ള അദ്ദേഹത്തിന്റെ രണ്ടാമത്തെ ഇസ്റാഈൽ സന്ദർശനമാണിത്. ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹുവുമായി മോദി ഉന്നതതല ചർച്ചകൾ നടത്തും. ഇരു രാജ്യങ്ങളും തമ്മിലുള്ള തന്ത്രപരമായ പങ്കാളിത്തത്തിലെ പുരോഗതി നേതാക്കൾ വിലയിരുത്തും.

ശാസ്ത്ര സാങ്കേതിക വിദ്യ, പ്രതിരോധം, സുരക്ഷ, കൃഷി, ജല മാനേജ്‌മെന്റ്, വ്യാപാരം, സാമ്പത്തികം തുടങ്ങിയ മേഖലകളിൽ കൂടുതൽ സഹകരണത്തിനുള്ള സാധ്യതകൾ ചർച്ചയുടെ ഭാഗമാകും. പ്രാദേശികവും ആഗോളവുമായ പ്രധാന വിഷയങ്ങളിൽ ഇരു നേതാക്കളും കാഴ്ചപ്പാടുകൾ പങ്കുവെക്കും.

ഇസ്രായേലിലേക്കുള്ള ഒരു ചരിത്ര സന്ദർശനമാണിതെന്നും നമ്മുടെ രാജ്യങ്ങൾ തമ്മിലുള്ള ഉഭയകക്ഷി സൗഹൃദത്തിന് ഇത് പുതിയൊരു ഉത്തേജനം നൽകുമെന്ന് ഉറപ്പുണ്ടെന്നും യാത്ര പുറപ്പെടുന്നതിന് മുമ്പ് പ്രധാനമന്ത്രി എക്സിൽ കുറിച്ചു. ഈ യാത്ര ഇരുരാജ്യങ്ങളും തമ്മിലുള്ള സുദൃഢമായ ബന്ധത്തെ കൂടുതൽ ശക്തിപ്പെടുത്തുമെന്ന് അദ്ദേഹം പ്രത്യാശ പ്രകടിപ്പിച്ചു.

ഇന്ത്യയും ഇസ്റാഈലും തമ്മിലുള്ള തന്ത്രപരമായ പങ്കാളിത്തത്തിൽ പുതിയ ലക്ഷ്യങ്ങൾ കൈവരിക്കാനും ഇരുരാജ്യങ്ങളുടെയും സമൃദ്ധമായ ഭാവിക്ക് ഈ സന്ദർശനം വഴിയൊരുക്കുമെന്നും അദ്ദേഹം വ്യക്തമാക്കി. ഇന്ത്യയും ഇസ്റാഈലും തമ്മിലുള്ള ബന്ധം സമീപകാലത്ത് വലിയ വളർച്ച കൈവരിച്ചതായും അദ്ദേഹം കൂട്ടിച്ചേർത്തു.

ഇസ്റാഈൽ പ്രസിഡന്റ് ഐസക് ഹെർസോഗും പ്രധാനമന്ത്രിക്ക് ഊഷ്മളമായ സ്വാഗതമരുളി. മോദിയുടെ സന്ദർശനം ചരിത്രപരമായ നിമിഷമാണെന്ന് വിശേഷിപ്പിച്ച ബെഞ്ചമിൻ നെതന്യാഹു, മോദി തന്റെ പങ്കാളി മാത്രമല്ല ഒരു വ്യക്തിപരമായ സുഹൃത്ത് കൂടിയാണെന്ന് എടുത്തുപറഞ്ഞു.

Summary

Prime Minister Narendra Modi has arrived in Israel for a significant two-day state visit to strengthen the strategic partnership between the two nations. He will engage in high-level talks with Prime Minister Benjamin Netanyahu across various sectors including defence, agriculture, and technology. This visit is expected to set new milestones for the bilateral relationship, with both leaders highlighting their strong personal and diplomatic bonds.