ഗൂഗിൾ മാപ്പിലൂടെ ഇനി ഭക്ഷണവും ഓർഡർ ചെയ്യാം, ഹോട്ടലും ബുക്ക് ചെയ്യാം; വൻ അപ്‌ഡേറ്റുമായി ഗൂഗിൾ

വാഷിംഗ്ടൺ | ഗൂഗിൾ മാപ്‌സിലെ ചാറ്റ്‌ബോട്ട് സംവിധാനമായ ആസ്ക് മാപ്‌സിൽ (Ask Maps) ഭക്ഷണ സാധനങ്ങൾ ഓർഡർ ചെയ്യാനും ഹോട്ടലുകൾ ബുക്ക് ചെയ്യാനും തത്സമയ പരിപാടികൾ കണ്ടെത്തുന്നതിനുമുള്ള പുതിയ ഫീച്ചറുകൾ ഗൂഗിൾ അവതരിപ്പിച്ചു. ആദ്യ ഘട്ടത്തിൽ അമേരിക്കയിലാണ് ഈ സൗകര്യങ്ങൾ ലഭ്യമാകുന്നത്.

ഉപയോക്താക്കൾക്ക് സാധാരണ സംസാരിക്കുന്ന ഭാഷയിൽ ആവശ്യങ്ങൾ വ്യക്തമാക്കി ഭക്ഷണം ഓർഡർ ചെയ്യാൻ സാധിക്കും. ഇതിനായി ആദ്യ ഘട്ടത്തിൽ ടോസ്റ്റ് (Toast), സ്ക്വയർ (Square) എന്നീ സേവനങ്ങളുമായി ഗൂഗിൾ പങ്കാളിത്തത്തിൽ ഏർപ്പെട്ടിട്ടുണ്ട്. ഊബർ ഈറ്റ്സ് (Uber Eats) സേവനവും വൈകാതെ ഇതിൽ ലഭ്യമാകും. ഗൂഗിൾ ഐ ഒ 2026 ൽ (Google I/O 2026) പ്രഖ്യാപിച്ച യൂണിവേഴ്സൽ കൊമേഴ്സ് പ്രോട്ടോകോളിന്റെ (Universal Commerce Protocol) ഭാഗമായാണ് ഈ സംവിധാനം വികസിപ്പിക്കുന്നത്.

ഹോട്ടൽ ബുക്കിംഗിനായി തുക, മുറിയുടെ വലുപ്പം, സമീപത്തുള്ള വിനോദസഞ്ചാര കേന്ദ്രങ്ങൾ എന്നിവ ആസ്ക് മാപ്‌സിനോട് ചോദിച്ചാൽ യോജിച്ച ഹോട്ടലുകൾ ചാറ്റ്‌ബോട്ട് നിർദ്ദേശിക്കും. തത്സമയം നിരക്കുകൾ ഒത്തുനോക്കാനും ലഭ്യത പരിശോധിക്കാനും ഈ സംവിധാനത്തിന് സാധിക്കും. ബുക്കിംഗ് പൂർത്തിയാക്കാൻ പങ്കാളി വെബ്‌സൈറ്റുകളിലേക്ക് ഇത് ഉപയോക്താക്കളെ വഴിതിരിച്ചുവിടും. കൂടാതെ സമീപത്തുള്ള സംഗീത പരിപാടികളും കോമഡി ഷോകളും കണ്ടെത്താനും ഇതിലൂടെ സാധിക്കും.

ഉപയോക്താക്കളുടെ മുൻഗണനകൾക്ക് അനുസരിച്ച് സേവനം ലഭ്യമാക്കാൻ പേഴ്സണൽ ഇന്റലിജൻസ് (Personal Intelligence) ഫീച്ചറും അവതരിപ്പിച്ചിട്ടുണ്ട്. ജിമെയിൽ (Gmail) അക്കൗണ്ടുമായി ബന്ധിപ്പിക്കുന്നതിലൂടെ ഇമെയിലിലെ ഹോട്ടൽ വിവരങ്ങൾ അടിസ്ഥാനമാക്കി സമീപത്തുള്ള റെസ്റ്റോറന്റുകൾ നിർദ്ദേശിക്കാൻ ആസ്ക് മാപ്‌സിന് സാധിക്കും. കലണ്ടർ (Calendar) ആപ്പുകളുമായുള്ള സംയോജനം പിന്നീട് ലഭ്യമാകും. ഈ സേവനങ്ങൾ ഉപയോക്താക്കളുടെ നിയന്ത്രണത്തിലായിരിക്കും പ്രവർത്തിക്കുക.

സെർച്ച് ഹിസ്റ്ററി ക്രമീകരണങ്ങൾ മാറ്റുന്നതിലൂടെ മുൻകാല സംഭാഷണങ്ങൾ ഓർമ്മയിൽ സൂക്ഷിക്കാനും പുതിയ അപ്‌ഡേറ്റിലൂടെ സാധിക്കും. പൊതു ഗതാഗത സംവിധാനങ്ങൾ ഉപയോഗിക്കുന്നവർക്കായി ബസ്, ബോട്ട് തുടങ്ങിയവയുടെ തത്സമയ വിവരങ്ങളും കാത്തിരിപ്പ് സമയവും ലഭ്യമാക്കുന്ന ലൈവ് വിജറ്റുകളും ഉൾപ്പെടുത്തിയിട്ടുണ്ട്. ഉപയോക്താക്കൾക്ക് സ്ഥാപനങ്ങളുടെ പ്രവർത്തി സമയം തുടങ്ങിയ വിവരങ്ങളിൽ തിരുത്തലുകൾ നിർദ്ദേശിക്കാനും അവസരമുണ്ട്.

ഇംഗ്ലീഷ് ഭാഷാ സംഭാഷണങ്ങൾക്കായി ഓസ്ട്രേലിയ, ബ്രസീൽ, കാനഡ, ഇന്തോനേഷ്യ, ജപ്പാൻ, മെക്സിക്കോ തുടങ്ങി 150 ലധികം രാജ്യങ്ങളിലേക്ക് ആസ്ക് മാപ്‌സ് വിപുലീകരിച്ചിട്ടുണ്ട്. ലൈവ് വിജറ്റുകളും പേഴ്സണൽ ഇന്റലിജൻസും എല്ലാ രാജ്യങ്ങളിലും ലഭ്യമാകുമെങ്കിലും ഫുഡ് ഓർഡറിംഗ്, ഹോട്ടൽ ബുക്കിംഗ് ഫീച്ചറുകൾ പിന്നീട് മാത്രമേ മറ്റ് രാജ്യങ്ങളിൽ ലഭ്യമാകൂ.

Content Highlights

Google has expanded its Ask Maps chatbot with new features like conversational food ordering, hotel booking, and live event discovery. The update integrates Personal Intelligence with Gmail to offer personalized recommendations. Initially launched in the US, Ask Maps is expanding globally in English to over 150 countries.