സ്‌നേഹക്ക് പരുക്കേറ്റത് സഹപ്രവര്‍ത്തകന്റെ അടിയേറ്റ്; വിവാദം കൊഴുക്കുന്നു

തിരുവനന്തപുരം | സെക്രട്ടേറിയറ്റ് മാര്‍ച്ചിനിടെ കെ എസ് യു സംസ്ഥാന വൈസ് പ്രസിഡന്റ് സ്നേഹക്ക് പരുക്കേറ്റത് സഹപ്രവര്‍ത്തകന്റെ തല്ലുകൊണ്ടെന്ന പ്രചാരണം ശക്തമാകുന്നു. മാധ്യമങ്ങളില്‍ പ്രസിദ്ധീകരിച്ച ചിത്രങ്ങളും ടെലികാസ്റ്റ് ചെയ്ത വീഡിയോകളും തെളിവായി സിപി എം പ്രവര്‍ത്തകര്‍ സൈബര്‍ രംഗത്ത് പ്രചരിപ്പിക്കുകയാണ്. രാത്രി നടന്ന ചാനല്‍ ചര്‍ച്ചകളിലും സി പി എം പ്രതിനിധികള്‍ ഈ വീഡിയോ തെളിവായി ഉന്നയിച്ചു. പോലീസ് വനിതാ പ്രവര്‍ത്തകയെ മര്‍ദിച്ചെന്ന കെ എസ് യു ആരോപണത്തെ പ്രതിരോധിക്കുന്നതാണ് ദൃശ്യങ്ങള്‍.

നിലത്ത് വീണ പോലീസുകാരനെ കെ എസ് യുക്കാര്‍ സംഘം ചേര്‍ന്ന് തല്ലുമ്പോള്‍ ഒരു പ്രവര്‍ത്തന്‍ വീശുന്ന വടി സ്നേഹയുടെ മുഖത്ത് കൊള്ളുന്നത് വീഡിയോയില്‍ കാണാം. മറ്റൊരു വീഡിയോയിലും സമാനസംഭവമാണ് വ്യക്തമാകുന്നത്. സെക്രട്ടേറിയറ്റ് മതില്‍ ചാടാന്‍ ശ്രമിക്കുന്നതിനിടെ സ്നേഹയെ പോലീസ് തടയാന്‍ ശ്രമിക്കുന്നതും തുടര്‍ന്ന് വീഴാന്‍ തുടങ്ങുമ്പോള്‍ ഒരു വടി സ്നേഹയുടെ മുഖത്തേക്ക് വീശിയടിക്കുന്നതും വീഡിയോയില്‍ കാണാം. ഇക്കാര്യങ്ങള്‍ തെളിവുസഹിതം പുറത്തുവന്നെങ്കിലും മര്‍ദ്ദിച്ചത് പോലീസുകാരാണെന്ന വാദത്തില്‍ കെ എസ് യുക്കാര്‍ ഇപ്പോഴും ഉറച്ച് നില്‍ക്കുകയാണ്.