മുന്നറിയിപ്പില്ലാതെ 48 പൈലറ്റുമാരെ എയര്‍ഇന്ത്യ പുറത്താക്കി

ന്യൂഡല്‍ഹി | സാമ്പത്തിക പ്രതിസന്ധിയുടേയും കൊവിഡ് വ്യാപനത്തിന്റേയും പേര് പറഞ്ഞ് ഒരു മുന്നറിയിപ്പും ഇല്ലാതെ 48 പൈലറ്റുമാരെ എയര്‍ഇന്ത്യ പുറത്താക്കി. ഇന്നലെ രാത്രി പത്ത് മണിക്കാണ് ജീവനക്കാരെ പുറത്താക്കി ഉത്തരവ് ഇറങ്ങിയത്. ഈ സമയത്ത് നടപടിക്ക് വിധേയരായ പല പൈലറ്റുമാരും വിമാനം പറത്തിക്കൊണ്ടരിക്കുകയായിരുന്നെന്നാണ് റിപ്പോര്‍ട്ട്. കഴിഞ്ഞ വര്‍ഷം എയര്‍ ഇന്ത്യയില്‍ നിന്ന് രാജിവെക്കാന്‍ കത്ത് നല്‍കുകയും പിന്നീട് നിയമപ്രകാരമുള്ള നടപടികളിലൂടെ രാജിക്കത്ത് പിന്‍വലിക്കുകയും ചെയ്ത പൈലറ്റുമാരെയാണ് പുറത്താക്കിയിരിക്കുന്നത്.

കൊവിഡിന് മുമ്പുള്ളതിനേക്കാള്‍ വളരെ കുറഞ്ഞ സര്‍വീസുകള്‍ മാത്രമാണ് എയര്‍ ഇന്ത്യ നടത്തുന്നത്. സമീപകാലത്തെങ്ങും വിമാന സര്‍വീസുകള്‍ സാധാരണഗതിയിലാകുമെന്ന് കരുതുന്നുമില്ല. ഇതുമൂലം കമ്പനിക്ക് വലിയ നഷ്ടമാണ് നേരിടേണ്ടിവരുന്നതെന്നും ശമ്പളം നല്‍കാന്‍ സാധിക്കാത്ത അവസ്ഥയിലാണ് കമ്പനിയെന്നും പുറത്താക്കിക്കൊണ്ടുള്ള ഉത്തരവില്‍ പറയുന്നുണ്ട്.

അതേസമയം പുറത്താക്കല്‍ നടപടി നിയമവിരുദ്ധമാണെന്ന് ഇന്ത്യന്‍ കൊമേഷ്യല്‍ പൈലറ്റ് അസോസിയേഷന്‍ ആരോപിക്കുന്നു. സംഭവത്തില്‍ അന്വേഷണം വേണമെന്ന് ഇവര്‍ ആവശ്യപ്പെടുന്നു. വിഷയത്തില്‍ കേന്ദ്ര വ്യോമയാന മന്ത്രാലയത്തെ സമീപിക്കാനാണ് സംഘടനയുടെ തീരുമാനം.