ലോകത്ത് കൊവിഡ് ബാധിതരുടെ എണ്ണം ഒന്നരക്കോടി പിന്നിട്ടു; 6.18 ലക്ഷം മരണം

വാഷിങ്ടണ്‍  |ആഗോളതലത്തില്‍ കൊവിഡ് രോഗികളുടെ എണ്ണം ഒന്നരക്കോടി കവിഞ്ഞു. 91 ലക്ഷത്തിലധികം ആളുകള്‍ ഇതുവരെ രോഗമുക്തരായി. വൈറസിനാല്‍ 6.18 ലക്ഷം പേര്‍ക്ക്‌ ഇതുവരെ ജീവഹാനി സംഭവിച്ചതായും വേള്‍ഡോമീറ്റര്‍ പ്രകാരമുള്ള കണക്കുകളില്‍ പറയുന്നുനിലവില്‍ 53.6 ലക്ഷം രോഗികളാണുള്ളത്. ഇതില്‍ 63,797 പേരുടെ നില അതീവ ഗുരുതരമാണ്.

അതേ സമയം അമേരിക്കയില്‍ രോഗബാധിതരുടെ എണ്ണം 40.28 ലക്ഷം കടന്നു. 66,936 പേര്‍ക്കാണ് അമേരിക്കയില്‍ പുതുതായി രോഗം സ്ഥിരീകരിച്ചത്. യൂറോപ്പിലാകെ ഒറ്റ ദിവസം കൊണ്ട് രോഗം സ്ഥിരീകരിച്ചവരുടെ നാലിരട്ടി വരുമിത്. അമേരിക്കയില്‍ ഏഴാം ദിവസവും തുടര്‍ച്ചയായി രോഗ ബാധിതരുടെ എണ്ണം 60,000 കടന്നു. 1,112 പേര്‍ കഴിഞ്ഞ ദിവസം മാത്രം മരിച്ചു.

അമേരിക്ക കഴിഞ്ഞാല്‍ ഏറ്റവും അധികം രോഗബാധിതരുള്ളത് ബ്രസീലിലാണ്. 21.66 ലക്ഷം പേര്‍. 44,887 പേര്‍ക്കാണ് ബ്രസീലില്‍ പുതുതായി രോഗം ബാധിച്ചത്. 1,346 പേര്‍ക്ക് സമീപ ദിവസങ്ങളില്‍ മാത്രം ജീവന്‍ നഷ്ടപ്പെട്ടു. അമേരിക്കയും ബ്രസീലും കഴിഞ്ഞാല്‍ ലോകത്ത് ഏറ്റവും അധികം രോഗബാധിതരുള്ളത് ഇന്ത്യയിലാണ്. 11.94 ലക്ഷം. 28000ത്തിലധികം പേരാണ് ഇന്ത്യയില്‍ ഇതുവരെ മരിച്ചത്.