Covid19
പൊന്നാനിയില് കര്ശന ജാഗ്രതയെന്ന് മുഖ്യമന്ത്രി
തിരുവനന്തപുരം | ലോക്ഡൗണ് നിലവിലുള്ള പൊന്നാനിയില് പോലീസ് കര്ശന ജാഗ്രത പുലര്ത്തിവരികയാണെന്നും മുഖ്യമന്ത്രി പിണറായി വിജയന്. ഉത്തരമേഖലഐ ജി അശോക് യാദവ് പൊന്നാനിയില് പോലിസിന്റെ പ്രവര്ത്തനങ്ങള്ക്ക് നേതൃത്വം നല്കുന്നുണ്ട്. പൊന്നാനി താലൂക്കിലെ ഓരോ പഞ്ചായത്തിലും പച്ചക്കറി കടകള് ഉള്പ്പെടെ അഞ്ച് കടകള്ക്ക് മാത്രമാണ് പ്രവര്ത്തിക്കാന് അനുവാദമുള്ളത്. സാധനങ്ങള് ആവശ്യമുള്ളവര് ഓര്ഡര് ചെയ്താല് കലക്ടര്മാരുടെ നേതൃത്വത്തില് വളണ്ടിയര്മാര് വീട്ടിലെത്തിച്ചു നല്കും.
സാമൂഹ്യ അകലം പാലിക്കാത്തതിന് പൊന്നാനി താലൂക്കില് 16 കേസുകള് രജിസ്റ്റര് ചെയ്തിട്ടുണ്ട്. ആരോഗ്യവകുപ്പിന്റെ നിര്ദേശം അനുസരിക്കാതെ രോഗികളെ ഡിസ്ചാര്ജ് ചെയ്തതിന് പൊന്നാനി താലൂക്കിലെ ഒരു സ്വകാര്യ ആശുപത്രിക്കെതിരെ കേസ് രജിസ്റ്റര് ചെയ്തിട്ടുണ്ടെന്നും മുഖ്യമന്ത്രി വാര്ത്ത സമ്മേളനത്തില് പറഞ്ഞു. മാസ്ക് ധരിക്കാത്തതിന് 5373 കേസുകള് ഇന്ന് റിപ്പോര്ട്ട് ചെയ്യപ്പെട്ടിട്ടുണ്ട്. ക്വാറന്റീന് ലംഘിച്ച 15 പേര്ക്കെതിരെ കേസെടുത്തു. ട്രെയിനുകളിലും മറ്റും വരുന്നവര് ക്വാറന്റീന് ഒഴിവാക്കാന് ശ്രമം നടത്തുന്നുണ്ട്. ഇത്തരക്കാര്ക്കെതിരെ കര്ശന നടപടിയെടുക്കുമെന്നും മുഖ്യമന്ത്രി പറഞ്ഞു