International
അഫ്ഗാനില് മാധ്യമപ്രവര്ത്തകര് സഞ്ചരിച്ച വാനിന് നേരെ ഭീകരാക്രമണം; രണ്ട് മരണം
കാബൂള് | അഫ്ഗാന് ടെലിവിഷന് സ്റ്റേഷനിലെ ജീവനക്കാരുമായി പോയ സ്വകാര്യ ബസിന് നേരെയുണ്ടായ ബോംബാക്രമണത്തില് ഒരു മാധ്യമപ്രവര്ത്തകനും ഡ്രൈവറും കൊല്ലപ്പെട്ടു. ശനിയാഴ്ച നടന്ന ആക്രമണത്തില് മറ്റ് നാല് ജീവനക്കാര്ക്ക് പരിക്കേറ്റതായി ആഭ്യന്തര മന്ത്രാലയം ഡെപ്യൂട്ടി വക്താവ് മാര്വ അമിനി പറഞ്ഞു.
കുര്ദിഷ് ടിവി ചാനലിലെ 15 ജീവനക്കാരുമായി പുറപ്പെട്ട ബസിന് നേരെയാണ് ആക്രമണമുണ്ടായത്. റോഡരികില് സ്ഥാപിച്ചിരുന്ന ബോംബ് വാഹനം കയറിയതോടെ പൊട്ടിത്തെറിക്കുകയായിരുന്നു. ചാനല് ജീവനക്കാരെ ലക്ഷ്യം വെച്ചാണ് ആക്രമണം നടന്നതെന്ന് അഫ്ഗാന് ആഭ്യന്തര മന്ത്രാലയ വൃത്തങ്ങള് അറിയിച്ചു.
ആക്രമണത്തിന്റെ ഉത്തരവാദിത്വം ഐസിസ് ഭീകരര് ഏറ്റെടുത്തിട്ടുണ്ട്. കഴിഞ്ഞ ഒരു വര്ഷത്തിനിടെ ഈ ചാനലിന് നേരെയുണ്ടായ രണ്ടാമത്തെ ഭീകരാക്രമണമാണിത്. ലോകത്ത് മാധ്യമപ്രവര്ത്തകര് ഏറ്റവും കൂടുതല് ഭീഷണി നേരിടുന്ന രാജ്യമാണ് അഫ്ഗാനിസ്ഥാന്.