ഹയര്‍സെക്കന്‍ഡറി കൊമേഴ്‌സ് പഠനം ഇനി സ്വതന്ത്ര സോഫ്ട്‌വെയറില്‍

Posted on: June 23, 2017 11:34 pm | Last updated: June 23, 2017 at 11:34 pm
SHARE

ഹയര്‍ സെക്കന്‍ഡറി കൊമേഴ്‌സ് പഠനത്തിന് സ്വതന്ത്ര സോഫ്ട്‌വെയര്‍ ഉപയോഗിക്കുന്നതിനുള്ള മാര്‍ഗനിര്‍ദേശങ്ങള്‍ ഹയര്‍സെക്കന്‍ഡറി ഡയറക്ടര്‍ പുറത്തിറക്കി. ഫെബ്രുവരി 15ന് നടന്ന കരിക്കുലം കമ്മിറ്റിയില്‍ ഹയര്‍സെക്കന്‍ഡറി പൂര്‍ണമായും സ്വതന്ത്ര സോഫ്ട്‌വെറിലേക്ക് മാറാന്‍ തീരുമാനിച്ചിരുന്നു. ഇതിന്റെ തുടര്‍ച്ചയായാണ് കൊമേഴ്‌സ് പഠനത്തിന് പ്രത്യേകം ഹാന്‍ഡ്ബുക്ക് ഉള്‍പ്പെടെയുള്ള നടപടിക്രമങ്ങള്‍ കരിക്കുലം സബ്കമ്മിറ്റി അംഗീകരിച്ചത്.

ഈ വര്‍ഷം പതിനൊന്നാം ക്ലാസില്‍ പഠനവും മൂല്യനിര്‍ണയവും പൂര്‍ണമായും സ്വതന്ത്ര സോഫ്ട്‌വെയറില്‍ ആയിരിക്കും. പന്ത്രണ്ടാം ക്ലാസില്‍ ഈ വര്‍ഷം സ്വതന്ത്ര സോഫ്ട്‌വെയറും പാഠപുസ്തകത്തിലുള്ള ഉടമസ്ഥാവകാശമുള്ള സോഫ്ട്‌വെയറുകളും ഉപയോഗിക്കാം. രണ്ട് ശ്രേണിയില്‍ പഠിച്ച കുട്ടിക്കും ഉത്തരമെഴുതാവുന്ന തരത്തിലായിരിക്കും ചോദ്യങ്ങള്‍ ക്രമീകരിക്കുക. അടുത്ത വര്‍ഷം മുതല്‍ രണ്ടാം വര്‍ഷവും പൂര്‍ണമായും സ്വതന്ത്ര സോഫ്ട്‌വെയറിലേക്ക് മാറും. ഒന്ന് മുതല്‍ പത്ത് വരെ ക്ലാസുകളും ഹയര്‍ സെക്കന്‍ഡറിയില്‍ കൊമേഴ്‌സിതര വിഭാഗങ്ങളും നേരത്തെ പൂര്‍ണമായും സ്വതന്ത്ര സോഫ്ട്‌വെയറിലേക്ക് മാറിയിരുന്നു.
1500 ഓളം കൊമേഴ്‌സ് അധ്യാപകര്‍ക്ക് ഇതിനകം സ്വതന്ത്ര സോഫ്ട്‌വെയര്‍ പരിശീലനം ഐടി@സ്‌കൂള്‍ നല്‍കി. ബാക്കി അധ്യാപകര്‍ക്ക് ജൂലൈ ആദ്യവാരത്തോടെ പരിശീലനം പൂര്‍ത്തിയാകുമെന്ന് ഐടി@സ്‌കൂള്‍ എക്‌സിക്യൂട്ടീവ് ഡയറക്ടര്‍ കെ അന്‍വര്‍ സാദത്ത് അറിയിച്ചു.